Inter-Real Madrid është ndeshja më e fortë e ditës së mërkurë në Champions League. Zikaltrit renditen në vend të fundit të grupit B me dy pikë pas tre javëve të para, dhe ndaj “Los Blancos” vlen vetëm fitorja. Antonio Conte e cilëson si finale sfidën ndaj kampionëve të Spanjës, flet rreth këtij dueli në konferencën për shtypin, teksa ndalet edhe te gjendja e skuadrës së tij.
“Kjo ndeshje është finale për ne. Na pret një përballje shumë e vështirë, të gjithë e dimë se çfarë skuadrës është Reali. Duhet të luajmë një ndeshje të madhe, pasi duhet të sigurojmë një rezultat të rëndësishëm. I kemi mundësitë për ta fituar këtë takim, ia dalim me përulësi dhe përqendrim maksimal.
E treguam forcën tonë edhe në Spanjë. Gjithsesi, fjalët nuk vlejnë, faktet mbeten. Duhet të marrim përgjegjësi, të gjithë pa përjashtim. Na duhen edhe 7 pikë për të siguruar kualifikimin. Mendoj se ndodhemi në grupin më të vështirë, por kemi treguar se meritojmë më shumë pikë sesa kemi. Kundërshtari? Qesh kur lexoj mediat spanjolle që flasin për mungesa, Reali nuk mund të ankohet.
Kanë një kontingjent të pasur, kanë shumë lojtarë të mëdhenj dhe tepër të aftë në përbërje. Ne jemi një skuadër sulmuese, mesfushorët tanë kanë karakteristika ofensive, kështu që mendoj se do të jetë e vështirë të luajmë me 3 sulmues. Ama, gjatë ndeshjes mund të ndryshojmë dhe rrezikojmë“, përfundon trajneri i Interit. /abcnews.al
