Ukraina ka aftësinë dhe të drejtën të përdorë raketat që Britania i jep për të goditur objektivat brenda territorit rus, tha David Cameron nga Kievi, të cilin e vizitoi të premten.
Në një deklaratë të parë në Londër, sekretari i jashtëm britanik tha: “Për sa i përket asaj që bëjnë ukrainasit, sipas mendimit tonë është vendimi i tyre se si t’i përdorin këto armë. Ata po mbrojnë vendin e tyre, janë pushtuar ilegalisht nga Putini, duhet t’i marrin këto masa. Ne nuk diskutojmë kushtet që vendosim për këto gjëra. Por le të jemi absolutisht të qartë, Rusia ka nisur një sulm ndaj Ukrainës dhe Ukraina ka absolutisht të drejtën të hakmerret kundër Rusisë”.
I pyetur për sqarim nëse kjo do të thoshte se objektivat brenda Rusisë mund të goditeshin me armë britanike, Lord Cameron u përgjigj pozitivisht: “Ukraina e ka këtë të drejtë. Ashtu siç Rusia po godet brenda Ukrainës, ju mund të kuptoni pse Ukraina ndjen se duhet të sigurohet që të mbrohet”.
Pozicioni i Cameron është në kontrast me qëndrimin e deritanishëm më hezitues të aleatëve perëndimorë në lidhje me perspektivën e përdorimit të raketave të tyre për të goditur tokën ruse.
Nga Kievi, Cameron tha gjithashtu se Britania do t’i japë Ukrainës ndihmë prej tre miliardë paund në vit “për aq kohë sa të jetë e nevojshme“.
Ai gjithashtu njoftoi mbërritjen e menjëhershme në Ukrainë të bombave britanike të drejtuara me lazer Paveway IV, më shumë raketa anti-ajrore dhe pajisje për 100 sisteme të mbrojtjes ajrore të lëvizshme nga njeriu./abcnews.al
