Loading ...
Mbretëria e Bashkuar po përballet me një valë të jashtëzakonshme të të nxehtit, ndërsa autoritetet kanë lëshuar paralajmërime të rralla të nivelit “të kuq” për temperatura ekstreme që mund të arrijnë deri në 40 gradë Celsius në pjesë të Anglisë dhe Uellsit.
Sipas Met Office, paralajmërimi është në fuqi për zona të gjera, nga London deri në Birmingham, për shkak të një “kupole nxehtësie” që ka përfshirë Evropën Perëndimore dhe ka sjellë kushte të pazakonta klimatike.
Meteorologët paralajmërojnë se temperaturat mund t’i afrohen rekordit historik prej 40.3°C, të regjistruar në Lincolnshire në korrik të vitit 2022, ndërsa pritet të thyhet edhe rekordi i muajit qershor prej 35.6°C.
Nxehtësia e lartë dhe lagështia e shtuar pritet të ndikojnë seriozisht në shëndetin publik, transportin, furnizimin me energji dhe ujë, si dhe në funksionimin e infrastrukturës. Autoritetet kanë paralajmëruar gjithashtu për rrezik më të madh aksidentesh në plazhe, lumenj dhe liqene, pasi shumë qytetarë pritet të kërkojnë freski pranë ujit.
Për shkak të temperaturave ekstreme, një numër shkollash do të punojnë me orar të reduktuar ose do të mbyllen përkohësisht për të mbrojtur nxënësit dhe stafin.
Ndërkohë, drejtuesit e transportit publik u kanë bërë thirrje qytetarëve të shmangin udhëtimet e panevojshme, duke paralajmëruar për vonesa dhe ndërprerje të mundshme.
Kompania hekurudhore Eurostar ka njoftuar anulimin e katër shërbimeve mes Londrës dhe Paris për shkak të kushteve të pafavorshme të motit.
Situata po monitorohet nga afër nga qeveria britanike, ndërsa edhe ushtria ka anuluar ceremoninë tradicionale të ndërrimit të rojes në Londër dhe Windsor për të mbrojtur shëndetin e personelit ushtarak gjatë valës së të nxehtit.
/abcnews.al/
