Rregullatori i fertilitetit britanik konfirmoi sot lindjet e foshnjave të para në Britani të Madhe duke përdorur teknikën eksperimentale që kombinon ADN-në nga 3 persona, përpjekje kjo për të parandaluar fëmijët të trashëgojnë sëmundje të rralla gjenetike.
Autoriteti Britanik i Fertilizimit dhe Embriologjisë Njerëzore tha se më pak se pesë foshnja kanë lindur në këtë mënyrë në Britani, por nuk dha detaje të mëtejshme për të mbrojtur identitetin e familjeve. Lajmi fillimisht u publikua në gazetën prestigjioze britanike “The Guardian”.
Në vitin 2015, Britania u bë vendi i parë në botë që miratoi legjislacionin që rregullon posaçërisht metodat për të ndihmuar në parandalimin e grave me mitokondri të dëmtuara, burimi i energjisë në një qelizë, nga kalimi i të metave tek foshnjat e tyre.
Defektet gjenetike mund të rezultojnë në sëmundje si distrofia muskulare, epilepsia, problemet e zemrës dhe paaftësitë intelektuale. Një në 200 fëmijë në Britani lind me çrregullim mitokondrial. Deri më sot, 32 pacientë janë autorizuar që të marrin trajtim të tillë. Tek një grua me mitokondri të dëmtuar, shkencëtarët marrin material gjenetik nga veza ose embrioni i saj, i cili më pas transferohet në një vezë donatore ose embrion që ka ende mitokondri të shëndetshme, por që i është hequr pjesa tjetër e ADN-së së saj kryesore.
Embrioni i fekonduar më pas transferohet në barkun e nënës. Materiali gjenetik nga veza e dhuruar përbën më pak se një për qind të fëmijës nga kjo teknikë.
“Trajtimi i dhurimit mitokondrial u ofron familjeve me sëmundje të rënda mitokondriale të trashëguara mundësinë e një fëmije të shëndetshëm”, tha Rregullatori i fertilitetit në Britani. Agjencia tha se ishte ende “herët”, por shpresonte se shkencëtarët e përfshirë, në Universitetin e Newcastle, do të publikonin së shpejti detajet e trajtimit.
Britania kërkon që çdo grua që i nënshtrohet trajtimit të marrë miratimin nga Autoriteti i Fertilizimit dhe Embriologjisë Njerëzore. Rregullatori thotë se për t’u kualifikuar, familjet nuk duhet të kenë mundësi të tjera të disponueshme për të shmangur kalimin e sëmundjes gjenetike.
Shumë kritikë kundërshtojnë teknikat e riprodhimit artificial, duke argumentuar se ka mënyra të tjera që njerëzit të shmangin kalimin e sëmundjeve tek fëmijët e tyre, të tilla si dhurimi i vezëve ose testet e shqyrtimit dhe se metodat eksperimentale nuk janë treguar ende të sigurta.
Të tjerë paralajmërojnë se ndryshimi i kodit gjenetik në këtë mënyrë mund të jetë një proces që vështirë mund të ndalet ose kontrollohet, e cila përfundimisht mund të çojë në foshnja të dizajnuara për prindërit që jo vetëm duan të shmangin sëmundjet e trashëguara, por të kenë fëmijë më të gjatë, më të fortë, më të zgjuar ose me pamje më të mirë.
Shkencëtarët në Evropë publikuan kërkime në fillim të këtij viti që tregojnë se në disa raste, numri i vogël i mitokondrive anormale që barten në mënyrë të pashmangshme nga veza e nënës tek ajo e dhuruesit, mund të riprodhohen kur foshnja është në mitër, gjë që përfundimisht mund të çojë në një sëmundje gjenetike. Mjekët në SHBA njoftuan lindjen e foshnjës së parë në botë duke përdorur teknikën e dhurimit të mitokondrive në vitin 2016, pas trajtimit të kryer në Meksikë.
