Marash Kumbulla është një nga surprizat më të bukura të këtij sezoni në Serie A. 19-vjeçari debutoi si titullar me Veronën dhe Shqipërinë, ka shënuar golin e parë në elitën e futbollit italian dhe vetëm dëmtimi që ka pësuar së fundmi e detyroi të qëndronte pushim.
Gianni Vitali ka folur rreth situatës së mbrojtësit në një prononcim për Radio Sportiva. Agjenti i lojtarit shqiptar vlerëson besimin që Shqipëria i ka dhënë, si dhe komenton zërat e merkatos.
“Juric i dha një shans Marashit, i cili është përgatitur shumë për të qenë i gatshëm për Veronën. Ai është i ri dhe po realizon ëndrrën e tij. Kombëtarja shqiptare e ka grumbulluar gjithmonë. E thërrasin prej vitesh me ekipet e moshave. Shqipëria ka besuar tek ai, ndërsa Italia ka bërë zgjedhje të tjera.
E ardhmja? Nuk e mohoj që po monitorohet nga shumë skuadra, është normale që të ngjallë kaq interes. Kumbulla e ka mendjen te Verona, kështu që nuk do të lëvizë në janar. Të shohim se çfarë do të ndodhë në verë“, përfundon agjenti i mbrojtësit shqiptar. /abcnews.al
