Varianti Delta po përhapet me shpejtësi në të gjithë botën duke rritur shqetësimin për përhapjen e mëtejshme të virusit dhe mos efektivitetin e vaksinave. E vetmja mënyrë për të mbajtur në kontroll virusin është përshpejtimi i fushatës së vaksinimit .
Holanda është një nga vendet që ka shënuar rritje të rasteve prej 500%, jo vetëm për shkak të transmetueshmërisë së variantit, por kryesisht për shkak të lehtësimit të masave kufizuese dhe rihapjes së klubeve të natës restoranteve dhe bareve.
Disa ditë më parë, kryeministri Holandez Mark Rutte u detyrua t’u kërkojë falje qytetarëve për heqjen e kufizimeve. Sidoqoftë, e gjithë Europa është në “kthetrat” e Delta. Në Belgjikë, rastet e reja të koronavirusit janë trefishuar në tre javët e fundit dhe, sipas epidemiologut Steven van Gucht, rastet e reja priten të dyfishohen çdo tetë ditë. Rusia edhe një herë theu të gjitha rekordet e mëparshme, duke regjistruar 786 viktima në 24 orë, numri më i lartë i të vdekurve gjatë këtij viti.
Në të njëjtën kohë, “Delta” është përhapur pasivisht në vendet aziatike, të cilat kanë shënuar rekord rastesh të reja, siç ndodhi dje në Vietnam dhe Indonezi. Organizata Botërore e Shëndetësisë gjithashtu tha se numri i viktimave për shkak të COVID-19 është rritur me 3% në javën e fundit, pas një rënie të qëndrueshme në nëntë javët e fundit.
Japonia, një nga vendet më të prekura nga koronavirusi, ka regjistruar numër rekord të infektuarish. Organizimi i Lojërave Olimpike në mes të një pandemie ka shkaktuar zemërimin e japonezëve kundër institucionit Olimpik. Sipas një sondazhi nga Ipsos, vetëm 22% e popullsisë dëshiron që të zhvillohen Lojërat Olimpike.
Varianti Delta është përhapur gjithashtu në Shtetet e Bashkuara, duke shënuar rritje në 46 shtete, veçanërisht në Midwest dhe Jug, ku fushata e vaksinimit është e ulët. Sidoqoftë, ka një rritje të ndjeshme të rasteve në New York. Qendrat e SHBA-së për Kontrollin dhe Parandalimin e Sëmundjeve (CDC) tha në një njoftim dje se numri i rasteve dhe shtrimeve në spital pritet të rritet.
Specialisti amerikan i vaksinave, Dr. Peter Hotez paralajmëroi dje se ngurrimi i të rriturve për t’u vaksinuar kundër COVID do të jetë i dëmshëm për fëmijët që do të infektohen, duke vënë në dukje se 30% e fëmijëve të infektuar me koronavirus vuajnë nga “COVID i zgjatur” për muaj me radhë.
Britania, e cila dje regjistroi 42,302 raste të reja në 24 orë, shumica që nga janari, po përgatitet për , “Ditën e Lirisë” të hënën që do të thotë heqjen e të gjitha kufizimeve. Sipas një njoftimi nga kryetari i Bashkisë së Londrës Sadiq Khan, maskat do të mbeten të detyrueshme në transportin publik. s.ba/abcnews.al
