Sekretari amerikan i Shtetit Antony Blinken tha se udhëheqësit në Lindjen e Mesme janë të vendosur për të penguar përhapjen e konfliktit të Gazës dhe se ekziston një dakordësi mbi nevojën për të “hartuar një rrugë politike përpara për palestinezët”.
“Bregu Perëndimor dhe Gaza duhet të bashkohen nën qeverisjen e udhëhequr nga palestinezët”, tha Blinken.
“E ardhmja e rajonit duhet të jetë integrimi, jo ndarja dhe konflikti”, tha Blinken, duke shtuar se për të realizuar këtë, duhet të krijohet një shtet i pavarus palestinez.
Në një deklaratë pas bisedimeve me Sekretarin Blinken, Princi i Kurorës së Arabisë Saudite Mohammed bin Salman nënvizoi rëndësinë e ndalimit të operacioneve ushtarake në Rripin e Gazës dhe nevojën për të krijuar kushte për rivendosjen e paqes dhe stabilitetit.
Mediat lokale kanë raportuar se kjo përpjekje synon të sigurojë që populli palestinez të marrë të drejtat e tij legjitime dhe të arrijë një paqe të drejtë dhe të qëndrueshme.
Arabia Saudite ka ndërprerë bisedimet diplomatike për të normalizuar marrëdhëniet me Izraelin për shkak të konfliktit ushtarak midis militantëve të Hamasit dhe forcave izraelite.
Të hënën, Blinken u takua me presidentin e Emirateve të Bashkuara Arabe Sheikh Mohammed bin Zayed Al Nahyan dhe zyrtarë të lartë nga Arabia Saudite përpara se të shkonte në Izrael.
Kryediplomati amerikan tha se do t’u kërkojë zyrtarëve izraelitë që të krijojnë më shumë hapësirë për dërgimin e ndihmave humanitare në Rripin e Gayës dhe të bëjnë më shumë për mbrojtjen e civilëve.
Sekretari amerikan i Shtetit, Antony Blinken tha gjithashtu se katër vende arabe dhe Turqia kanë rënë dakord të fillojnë planifikimin për rindërtimin pas konfliktit dhe qeverisjen e Gazës, sapo të përfundojë lufta e Izraelit kundër Hamasit.
Në një mision urgjent në Lindjen e Mesme që synon kryesisht frenimin e përhapjes së konfliktit në një luftë rajonale, Blinken tha të hënën se Arabia Saudite, Jordania, Katari, Emiratet e Bashkuara Arabe dhe Turqia do të konsideronin pjesëmarrjen dhe kontributin për të rindërtuar pas luftës Rripin e Gazës, i cili është shkatërruar nga bombardimet izraelite në tre muajt e fundit.
Këto vende i kishin rezistuar më parë thirrjeve të Shteteve të Bashkuara për fillimin e planifikimit të pasluftës, duke këmbëngulur se së pari duhet të ketë një armëpushim dhe pakësim të vuajtjeve të civilëve, të shkaktuar nga ofensiva ushtarake e Izraelit në përgjigje të sulmit vdekjeprurës të Hamasit në Izrael më 7 tetor.
Në turneun e tij të fundit në Lindjen e Mesme, i katërti që nga fillimi i luftës në tetor, Blinken tha se ato vende tani janë të hapura për një planifikim të tillë dhe se secili do të konsideronte përfshirjen e tij në atë që do të vendoset përfundimisht.
“Ne ramë dakord të punojmë së bashku dhe të koordinojmë përpjekjet tona për të ndihmuar në stabilizimin dhe rimëkëmbjen e Gazës, për të hartuar një rrugë politike përpara për palestinezët dhe për të punuar drejt paqes, sigurisë dhe stabilitetit afatgjatë në rajon në tërësi”, u tha Blinken gazetarëve.
Ai nuk ofroi detaje për kontributet e mundshme të këtyre vendeve.
Ai tha gjithashtu se Turqia dhe katër vendet arabe kishin rënë dakord të përdorin ndikimin e tyre për të frenuar zgjerimin e luftës së Gazës në një konflikt më të gjerë në Lindjen e Mesme, që do të ishte shkatërrues për rajonin dhe do të kishte pasoja negative në tregtinë dhe ekonominë globale.
Sekretari Blinken i bëri komentet pas takimit me Princin saudit Mohammed bin Salman në kampin e tij dimëror jashtë qytetit Al Ula në pjesën perëndimore të Arabisë Saudite, të cilin vendi po e shndërron në një destinacion të madh turistik./abcnews.al
