Sekretari amerikan i Shtetit, Anthony Blinken u takua me zëvendëspresidentin kinez Han Zheng sot në margjinat e Asamblesë së Përgjithshme të OKB-së në Nju Jork, teksa dy ekonomitë më të mëdha në botë kërkojnë të stabilizojnë marrëdhëniet e tyre të tensionuara.
Këshilltari i Sigurisë Kombëtare i Shtëpisë së Bardhë, Jake Sullivan, u takua me ministrin e Jashtëm kinez Wang Yi në Maltë gjatë fundjavës dhe të dyja palët siguruan se bisedimet 12-orëshe ishin “të sinqerta, kuptimplota dhe konstruktive”.
Takimi i Blinken me Han është pjesë e një sërë kontaktesh midis zyrtarëve amerikanë dhe kinezë që mund të hapin rrugën për një samit midis presidentëve Joe Biden dhe Xi Jinping më vonë këtë vit. “Njerëzit presin që ne ta menaxhojmë marrëdhënien tonë me përgjegjësi. Shtetet e Bashkuara janë të përkushtuara për ta bërë këtë”, tha kryediplomati amerikan në fillim të takimit të tij me Han. “Siç e sheh SHBA-ja, diplomacia ballë për ballë është mënyra më e mirë për të trajtuar fushat ku nuk pajtohemi dhe mënyra më e mirë për të eksploruar fushat e bashkëpunimit mes nesh”, shtoi ai.
Biden kohët e fundit shprehu zhgënjimin që Xi nuk mori pjesë në samitin e Grupit 20 (G20) në Indi, por tha se do ta “takonte” në një moment. Mundësia tjetër e mundshme e Biden është në forumin e Bashkëpunimit Ekonomik Azi-Paqësor që do të mbahet në San Francisko në nëntor. As Blinken dhe as Han nuk e bënë të qartë nëse ai takim do të zhvillohet.
“Për momentin, marrëdhëniet e Kinës me SHBA-në po përballen me shumë vështirësi dhe sfida,” tha Han, duke vënë në dukje se Pekini shpreson se Uashingtoni do të bëjë përpjekje për të promovuar stabilitetin e marrëdhënieve të tyre. “Bota ka nevojë për marrëdhënie të qëndrueshme dhe të shëndetshme midis Kinës dhe SHBA-së”, përfundoi ai.
