Loading ...Salentina Qepi është vetëm 24 vjeçe, por pasioni i saj për motorët është kthyer në një mënyrë jetese. Vajza nga Dukati është e pandarë nga adrenalina dhe sfidat mbi dy rrota.
Dashurinë për motorin e mori në familje, pasi të dy prindërit e saj kanë qenë motoristë.
Madje, kujton me humor momentet kur prindërit shkonin ta merrnin nga shkolla me motor. “Erdhi Rossi të të marrë”, i thoshin shokët e klasës. Ishte pikërisht mamaja ajo që mësoi të ngiste motorin nga babai dhe më pas ia përcolli këtë pasion edhe së bijës.
Salentina e nisi me një motor të thjeshtë, por me kalimin e kohës sfidat u bënë gjithnjë e më të mëdha. Sot ajo përballet me terrene të vështira, mot të keq dhe situata që kërkojnë përqendrim maksimal.
Për të, çdo dalje me motor është një sfidë me veten dhe me kufijtë e saj. Ka hasur edhe paragjykime, por ka zgjedhur të mos heqë dorë nga ajo që dashuron.
Dhe pas gjithë adrenalinës fshihet edhe një emocion i fortë: kur motori i prishet, Salentina tregon se e përjeton aq keq sa edhe qan. Një histori ku pasioni, familja dhe adrenalina bashkohen në një dashuri të pazakontë për motorët./abcnews.al
