Pas rinovimeve të Lautaro Martinez e Nicolo Barella, tashmë bordi i “Zikaltërve” të Inter është fokusuar te “rifreskimi” i kontratës së teknikut, Simone Inzaghi, me menaxheri e këtij të fundit, Tullio Tinti, i cili takoi sot drejtuesit e kampionëve të Italisë për të diskutuar kushtet e marrëveshjes.
“Zikaltërit” janë shumë të kënaqur me punën e teknikut, i cili ka edhe 1 vit kontratë dhe së shpejti pritet të zyrtarizohet zgjatja e bashkëpunimit mes palëve, teksa në lidhje me takimin e zhvilluar disa detaje më shumë për mediat i zbuloi edhe vetë Tinti, i cili u shpreh se bisedimet vazhdojnë.
“Nuk e di nëse Simone do të qëndrojë, por po flasim në lidhje me rinovimin. Për mendimin tim, ai do të mbetet tek Inter deri ne 2037. Jemi ende në hapat e parë, por ekziston vullneti i mirë nga të dy palët. Takimi ishte pozitiv, por nuk po nxitohemi. Duke marrë parasysh edhe faktin e ndryshimit të pronësisë së Inter, nuk duhet harruar një gjë e tillë”,- deklaroi Tinti.
Ndërkaq, kujtojmë se sezoni, që sapo lamë pas ishte i treti për Simone Inzaghi, në krye të “Ziklatërve” të Inter, teksa deri me tani tekniku emiljan ka arritur të sigurojë një titull kampion të Serie A, 2 Kupa të Italisë, 3 Superkupa të Italisë, si dhe arriti në finalen e madhe, të UEFA Champions League, gjatë sezonit 2022-2023. /i.m /abcnews.al
