Presidenti i SHBA-së Joe Biden ndodhet në Irlandën e Veriut për të marrë pjesë në 25-vjetorin e Marrëveshjes të së Premtes së Mirë që solli paqen pas 30 vitesh dhunë.
SHBA-të ndihmuan në negocimin për t’i dhënë fund dhunës që shkaktoi mijëra viktima. Në vizitën e tij të parë presidenciale në Irlandën e Veriut, Biden do të përgëzojë dhe inkurajojë liderët e vendit që të punojnë në politikat tregtare dhe ekonomike universalisht të dobishme.
Por ai nuk pritet të bëjë asnjë përpjekje për të ndihmuar në zgjidhjen e një krize të re politike që ka prekur marrëveshjen e paqes dhe ka bllokuar qeverinë e Irlandës së Veriut.
Biden do të nisë vizitën në Irlandën e Veriut të mërkurën me kryeministrin e Mbretërisë së Bashkuar Rishi Sunak. Para se të flasë në Ulster, ai do të takohet me secilin prej liderëve të pesë partive kryesore politike të Irlandës së Veriut, raporton abcnews.al.
Pas fjalimit në Universitetin e Ulsterit, Biden do të udhëtojë në Republikën e Irlandës për një vizitë tre-ditore që do të përfshijë një fjalim në parlamentin e Dublinit, duke marrë pjesë në një darkë shtetërore dhe udhëtime në dy nga qytetet e lindjes së stërgjyshërve të tij.
Ai do të udhëtojë për në County Louth, në bregun lindor të Irlandës, të mërkurën për të vizituar një varrezë, një kështjellë, për të ecur në qendër të Dundalk dhe për të marrë pjesë në një mbledhje të komunitetit.
Disa banorë të Belfast-it thanë se vizita e Biden ishte e rëndësishme, edhe pse ajo do të jetë e shkurtër.
“Unë mendoj se është diçka pozitive që ndodhet në Irlandë për shkak të përvjetorit të ‘trazirave’,” tha Julie McNeil.
Ajo i referohej më shumë se tre dekadave të dhunës që kanë shkaktuar më shumë se 3600 të vdekur.
“Unë mendoj se është e rëndësishme vizita e tij.”
Megjithatë, ajo tha se ishte pak e zhgënjyer që vizita e presidenti amerikan do të ishte kaq e shkurtër në Belfast.
“Ai është një burrë i zënë dhe është 80 vjeç. Jam e sigurt se është e vështirë për të”, tha ajo.
Një operacion masiv sigurie ishte planifikuar për qëndrimin e Biden në Belfast, me një prani të madhe policie në rrugët e bllokuara rreth hotelit ku do të qëndrojë presidenti.
Muajin e kaluar, agjencitë e inteligjencës në Mbretërinë e Bashkuar ngritën alarmin për kërcënime terroriste. Por Biden tha në atë kohë se edhe rreziku i shtuar i sulmit nuk do ta pengonte atë të vinte në Irlandë.
Policia në Irlandën e Veriut zbuloi katër bomba të improvizuara në një varrezë në Creggan, pranë Derry, vetëm disa orë para mbërritjes së presidentit amerikan. Biden vizitoi Irlandën për herë të fundit në vitin 2016, kur ishte nënpresident i SHBA-së.
/abcnews.al
