Presidenti amerikan Joe Biden dhe homologu i tij kinez Xi Jinping pritet të takohen të mërkurën e ardhshme, më 15 nëntor në San Francisko, në samitin e parë midis dy fuqive në një vit.
Palët ende nuk e kanë konfirmuar zyrtarisht datën, por janë marrë masa që takimi të zhvillohet më 15, tha një zyrtar dhe një diplomat amerikan në kushte anonimiteti.
Takimi do të zhvillohet në margjinat e samitit të Bashkëpunimit Ekonomik Azi-Paqësor (APEC). Shtetet e Bashkuara janë mikpritëse, ndërsa Kina është një vend anëtar i forumit ndërkombëtar.
Edhe pse ende nuk ka asgjë zyrtare, Uashingtoni dhe Pekini kanë lënë të kuptohet se takimi do të zhvillohet. Zëdhënësja e Shtëpisë së Bardhë Karin Jean-Pierre i tha shtypit më 31 tetor se presidenca amerikane pret me padurim një “diskutim konstruktiv” në San Francisko.
Samiti do të jetë i pari që nga nëntori 2022 në Bali, Indonezi, në periferi të G20.
Në atë kohë, të dyja palët i kishin cilësuar si pozitive bisedimet, duke theksuar se kërkonin të shmangnin përshkallëzimin e konkurrencës mes dy forcave dhe konfliktin mes tyre.
Por në fillim të vitit, tensioni mes Uashingtonit dhe Pekinit arriti kulmin, me rastin e historisë së një balone kineze që fluturoi në një lartësi të madhe mbi SHBA, të cilin qeveria amerikane e quajti spiune dhe dërgoi një avion për ta rrëzuar.
Nga ana tjetër, qeveria kineze po përballet me pakënaqësi në rritje për përshkallëzimin e presionit ekonomik të SHBA-së, veçanërisht kufizimet në eksportet e mikroçipave duke përmendur shqetësimet e Uashingtonit se Pekini do t’i përdorë ato për qëllime ushtarake.
/abcnews.al
