Loading ...
Komisioni Evropian ka zhbllokuar 4.2 miliardë euro nga fondet e kohezionit për Hungarinë, pasi vlerësoi se Budapesti ka përmbushur kushtet e kërkuara për forcimin e sundimit të ligjit dhe mbrojtjen e fondeve të BE-së.
Vendimi i hap gjithashtu rrugën që studentët dhe studiuesit hungarezë të rikthehen në programet Erasmus+ dhe Horizon Europe, pas kufizimeve të vendosura nga Brukseli.
Në vitin 2022, BE-ja kishte ngrirë 6.3 miliardë euro fonde për Hungarinë, duke ngritur shqetësime për korrupsionin, konfliktet e interesit dhe parregullsitë sistematike në prokurimet publike gjatë qeverisjes së Viktor Orbánit.
Presidentja e Komisionit Evropian, Ursula von der Leyen, tha se Hungaria ka ndërmarrë hapa të rëndësishëm për forcimin e sundimit të ligjit dhe mbrojtjen e interesave financiare të Bashkimit Evropian.
“Reformat japin rezultate”, deklaroi von der Leyen, duke theksuar se zhbllokimi i fondeve do t’u mundësojë sërish studentëve dhe studiuesve hungarezë të përfitojnë plotësisht nga programet evropiane.
Kryeministri Péter Magyar kishte premtuar gjatë fushatës zgjedhore se do të rikthente fondet evropiane të ngrira gjatë 16 viteve të qeverisjes së Orbánit. Në maj, Magyar dhe von der Leyen kishin rënë dakord që fondet të zhbllokoheshin nëse Hungaria përmbushte një seri reformash dhe objektivash për sundimin e ligjit.
Budapesti duhej të përmbushte 27 të ashtuquajtura “super-kushte”, së bashku me më shumë se 100 kërkesa të tjera. Në fund të gushtit, qeveria hungareze njoftoi se kishte përmbushur të gjitha kushtet, përfshirë zgjidhjen e çështjes së fondacioneve me interes publik, të njohura si KEKVA, përmes të cilave qeveria e mëparshme kishte marrë nën kontroll institucione publike, përfshirë universitete.
Megjithatë, pjesa tjetër e fondeve nuk është zhbllokuar ende. Rreth 10 miliardë euro nga fondet e rimëkëmbjes mbeten në pritje të vlerësimit të Komisionit Evropian.
Ndërkohë, edhe 2 miliardë euro të tjera nga fondet e kohezionit vazhdojnë të jenë të ngrira për shkak të shqetësimeve lidhur me sistemin e azilit, ligjin për mbrojtjen e fëmijëve dhe lirinë akademike.
Magyar ka premtuar se do të përpiqet t’i zgjidhë këto çështje deri në fund të vitit.
