Ministrat e Energjisë të Bashkimit Europian vendosën të zgjasin kufirin e çmimit të gazit deri në janar 2025. Kufiri i çmimit u miratua për herë të parë në dhjetor të vitit të kaluar si pjesë e reagimit emergjent të bllokut ndaj krizës energjetike që çoi në rritjne e faturave të gazit dhe inflacionin.
Ekspertët e energjisë kundërshtuan propozimin, duke argumentuar se do të zhdukte tregun e lirë. Debati vazhdoi për muaj të tërë derisa u arrit një konsensus për të vendosur një kufi çmimi me kushte të rrepta.
Megjithatë, procesi me dy hapa dhe çmimet e larta e bëjnë të pamundur që kufiri të vihet në fuqi menjëherë. Të hënën, tregtimi në TTF u mbyll me 35,55 €, një nga shifrat më të ulëta të parë gjatë dy viteve të fundit.
Ministrat e energjisë zgjodhën të zgjasin masën deri në janar 2025, duke argumentuar se tregjet e energjisë janë ende shumë të brishta, ndërsa lufta e Rusisë kundër Ukrainës vazhdon.
“Kjo do të na lejojë të sigurojmë stabilizimin e tregjeve të energjisë, të lehtësojmë efektin e krizës dhe të mbrojmë qytetarët e BE-së nga çmimet e tepërta të larta të energjisë”, tha Teresa Ribera, ministrja e Spanjës për tranzicionin ekologjik, duke folur në emër të Këshillit.
Ministrat vendosën gjithashtu të zgjasin deri në dhjetor 2024 një rregullore emergjente për të koordinuar blerjet e gazit dhe shkëmbimet ndërkufitare në rast mungesash.
Një ligj i tretë, i krijuar për të përshpejtuar vendosjen e sistemeve të rinovueshme, do të zgjatet deri në fund të qershorit 2025. Nga ana tjetër, Azerbajxhani synon të dyfishojë eksportet e tij të gazit në Europë deri në vitin 2027, sipas presidentit Ilham Aliyev.
Duke folur në ceremoninë e inaugurimit për gazsjellësin interkonektor Bullgari-Serbi në Nish, Serbi, më 10 dhjetor, Aliyev konfirmoi se Baku do të përmbushë premtimin ndaj Brukselit për të dyfishuar eksportet e gazit në Europë në 20 miliardë metra kub në vit deri në vitin 2027.
Për të dyfishuar eksportet e gazit në Europë, Baku duhet të rrisë prodhimin e gazit dhe të rrisë kapacitetin e tre tubacioneve tranzit që përbëjnë Korridorin Jugor të Gazit, i cili transporton gazin nga Deti Kaspik në tregjet europiane.
Ky premtim, në korrik të vitit të kaluar në një marrëveshje historike me Bashkimin Europian, erdhi në vazhdën e pushtimit rus të Ukrainës, i cili ka bërë që eksportet e gazit rus në Europë të shkojnë në zero dhe çmimet europiane të gazit të rriten në nivele të paprecedentë.
/abcnews.al
