Makinat elektrike të prodhuara në Kinë që hyjnë në tregun europian nga nesër, 5 korrik, do të duhet të paguajnë tarifa shtesë deri në 37.6% të vlerës së tyre për të kompensuar “përparësitë e padrejta” që përfitojnë në vendin aziatik.
Sipas Komisionit, konsultimet me qeverinë kineze janë intensifikuar javët e fundit, pas një shkëmbimi pikëpamjesh midis Zëvendës Presidentit Ekzekutiv të Komisionit Europian Valdis Dombrovskis dhe ministrit kinez të Tregtisë Ëang Ëentao.
Kontaktet po vazhdojnë në nivel teknik me synimin për të arritur një zgjidhje në përputhje me OBT-në që trajton në mënyrë adekuate shqetësimet e ngritura nga Bashkimi Europian.
Megjithatë, nëse nuk arrihet marrëveshje përpara nëntorit të ardhshëm, tarifat do të mbeten në fuqi për një periudhë prej pesë vitesh.
Pas hetimit paraprak të Komisionit Europian, kompanitë kineze paraqitën pretendimet e tyre në lidhje me subvencionet “e padrejta” shtetërore që marrin nga Pekini.
BYD Group do të përballet me tarifa 17.4%, Geely Group 19.9% dhe SAIC Company do të përballet me 37.6%. Vendet anëtare të BE-së do të vendosin për masën brenda disa javësh në një votim.
Franca dhe Spanja mbështesin vendimin e Komisionit Europian.
/abcnews.al
