BRUKSEL – BE-ja kërkon të sigurojë komunikime të sigurta për bizneset dhe qytetarët përmes një sistemi satelitësh.
Negociatorët e Parlamentit Evropian dhe vendet anëtare ranë dakord dje në mbrëmje për të ngritur një sistem satelitor të quajtur “Infrastruktura për Qëndrueshmërinë, Ndërlidhjen dhe Sigurinë nga Sateliti”, ose shkurt IRIS².
“Investimi arrin vlerën e 2.4 miliardë eurove (2.5 miliardë dollarë) nga buxheti i BE-së në vitet e ardhshme”, sipas një deklarate.
“Kjo është historike”, shkroi në Twitter komisioneri përgjegjës i BE-së, Thierry Breton, pas marrëveshjes. BE-ja po shton kështu një komponent të tretë në infrastrukturën e saj strategjike hapësinore, në sistemin e navigimit satelitor “Galileo dhe Copernicus”, i cili përdoret për vëzhgimin e Tokës.
“Ky program është një hap i rëndësishëm drejt një autonomie më strategjike për Evropën”, tha anëtarja e Parlamentit Evropian (PE), Angelika Niebler për programin e ri.
Lufta në Ukrainë tregoi se BE-ja deri më tani kishte qenë plotësisht e varur nga vendet jashtë bllokut ose kompanitë private të telekomunikimeve satelitore.
“Programi i miratuar, sot synon ta ndryshojë këtë”, tha Niebler.
IRIS² ka për qëllim kryesisht të sigurojë qëndrueshmërinë e sistemeve të BE-së, gjithashtu të mbrojë infrastrukturën e rëndësishme si, rrjetet e energjisë ose kujdesi shëndetësor, si dhe aksesin e qytetarëve dhe bizneseve në internetin e shpejtë.
Marrëveshja duhet të konfirmohet zyrtarisht edhe nga Parlamenti Evropian, por kjo konsiderohet një formalitet. /ATA
