Bashkimi Evropian i ka dërguar Rusisë pothuajse 1 miliardë euro çdo ditë për energji që nga fillimi i luftës në Ukrainë, pranoi më herët sot shefi i tij i punëve të jashtme, raporton Dailymail.
Josep Borrell i tha Parlamentit Evropian se shuma e ndihmës që i është dhënë Kievit është e zbehtë në krahasim me shumën që BE-ja ka shpenzuar për energjinë ruse, ndërsa bëri presion për vendosjen e më shumë sanksioneve ndaj naftës dhe qymyrit kundër Putinit dhe rinovimin e dërgesave të armëve në vijat e frontit.
“Ne i kemi dhënë Ukrainës 1 miliard euro, por një miliard euro është ajo që ne i paguajmë Putinit çdo ditë për energjinë që ai na jep”, tha kryediplomati i BE-së.
“Ne duhet të vazhdojmë të armatosim Ukrainën… Më shumë armë, kjo është ajo që ukrainasit presin nga ne.”
Sindikata e 27 shteteve i ka paguar Rusisë rreth 35 miliardë euro që nga fillimi i konfliktit në Ukrainë më 24 shkurt, sipas Borrell. Ndërsa konflikti vazhdon në ditën e 41-të, kjo do të thotë se afërsisht 850 milionë euro janë derdhur në arkat e Putinit nga Evropa çdo ditë që kur tanket ruse kaluan përtej kufirit.
/abcnews.al
