Sekretari për Diasporën në Partinë Demokratike, Indrit Hoxha thotë se bashkimi i kësaj force politike do kohën e vet, pas përçarjes prej 2 vitesh.
Në një intervistë për ‘Edicionin Qendror” në ABC News, Hoxha u shpreh se kriza në PD erdhi nga Lulzim Basha, kur ishte në krye të partisë.
Sipas Hoxhës, zyrtarët e PD duhet të jenë pjesë e listave të hapura.
“Ne kemi primaret, është e drejtë statutore që nuk mund të anashkalohet apo të shkelet. Unë personalisht, si sekretar për diasporën, refuzoj të jem pjesë e listës së mbyllur të PD. Të gjithë ne duhet të jemi pjesë e listave të hapura të PD. Parimi në këtë situatë është sakrifica. Nëse ne, zyrtarët e kësaj force politike, nuk bëjmë sakrifica, nuk kemi pse ta kërkojmë te demokratët që kanë 12 vite në opozitë. Ky është bashkim në diversitet. Ne nuk kemi qenë në dy vite e gjysmë në kushte normale si forcë politike. Kjo ka krijuar një hatërmbetje te militantët e kësaj force politike, edhe përplasja brenda nesh nuk ka qenë e lehtë. Kjo do dojë kohën e vet të rikuperimit dhe pranimit. Nga këta që kanë qenë kundërshtarë të shumicës, duhet të kemi dhe ndjesë të sinqertë ndaj këtyre demokratëve. Me këta demokratë do dalin në fushatë elektorale. Në kushtet që jemi, kjo gjë ka krijuar hatërmbetje për drejtuesit politikë.
Janë primaret që do caktojnë se kush do të jetë kandidat për deputet. Unë mendoj se kthesa merret me sakrificë. Nëse nuk sakrifikojmë, nëse nuk i nënshtrohemi primareve, madje, nëse në primaret e kaluara votonin simpatizantët dhe anëtarët, këtë radhë jam që t’i hapim për të gjithë popullin shqiptar, të kenë të drejtën e tyre për të zgjedhur kandidat. Është çështje organizimi, teknike që nuk mund të realizohet në kohë të shkurtër. Të gjithë zyrtarët e PD, të jemi te listat e hapura. Me listë të mbyllur rrezikojmë, rezultati të mos jetë ai çka shqiptarët dhe opozitarët presin për rotacionin politik. PD është në kohë të mendojë dhe t’i ndryshojë këto gjëra.
Unë bëj me faj Lul Bashën dhe Edi Ramën, të dy, edhe Luli që ka qenë lidershipi i PD për mbi 10 vite. Akuzat e para si antiamerikan, ne na kanë ardhur nga ish kryetari i partisë sonë. PD duhet të reflektojë, të ketë hapje reale ndaj shoqërisë shqiptare, intelektualëve, akademikëve, çdo lloj fushe. Parlamenti shqiptar është krimminalizuar, të fillojmë ta ndryshojmë ne, të kthehen intelektualët në parlamentin shqiptar”, theksoi ai./abcnews.al
