Kryetari i Partisë Demokratike këtë të premte po zhvillon takime elektorale në Gjirokastër.
Kryedemokrati shfaqet mes turmës së simpatizantëve të PD-së , ku duket se distanca sociale nuk zbatohet.
Lideri i opozitës Basha është pritur nga gjirokastritët me thirrje “Rama ik”.
“Të dashur motra dhe vëllezër, të rinj dhe të reja, vajza dhe djem, zonja dhe zotërinj të Gjirokastrës ju falënderoj nga zemra për këtë pritje të jashtëzakonshme. Ndryshimi ka filluar, e shoh në sytë e nënave nga Gjirokastra në Shkodër, nga Durrësi në Korçë.
Me 25 prill do ta çlirojmë Gjirokastrën dhe Shqipërinë, nga mjerimi e nga papunësia. Me 25 prill çdo shqiptar e çdo shqiptare do të votojë për ndryshimin, do të votojë për fëmijët e tij dhe të saj, do të votojë për ekonominë, për punësimin, për Evropën dhe për Shqipërinë si gjithë Evropa.
Ndaj ju bëj thirrje e para të merrni masa me maska dhe me distancë, kujdesuni për shëndetin tuaj. Dhe e dyta, mos harroni kjo është një betejë për fëmijët tuaj, për familjet tuaja. Është një betejë fitorja e të cilës do të thotë fitore e Gjirokastrës, fitore e Shqipërisë dhe e shqiptarëve pa dallim”, është shprehur Basha./abcnews.al
