Drejtuesi i degës së PD-së në Fier, Luan Baçi kundërshton vendimin e Lulzim Bashës që e zëvendësoi në këtë post me Agron Kapllanajn. Deputeti demokrat mbrëmjen e sotme ka mbledhur Kryesinë e degës së PD-së në Fier dhe është shprehur se konteston mënyrë si po procedohet. Ai tregoi se Basha i kishte kërkuar dorëheqjen, gjë që shton se nuk e pranoi duke argumentuar vendimin.
“Kam pasur një takim mbrëmë 10 minuta me Lulzim Bashën, ka bërë një propozim për komandim dhe kërkonte dorëheqjen time, gjë që nuk e kam dhënë. I kam thënë nuk po jap dakordësi si individ pavarësisht se kam edhe pozicionin e deputetit dhe kryetarit të degës, pa pyetur Kryesinë e Degës.
Nuk jam as partizan i Berishës as i Bashës. Jam plotësisht për respektimin e statutit, mund të bëhej edhe nga 2 apo 3 deputet kjo lëvizje por kur kjo bëhet nga lideri historik atëherë vëmendja bëhet edhe më e madhe. Lista e Qarkut Fier ka pasur probleme pasi kandidatja e vendit të dytë nuk ka lidhje me Partinë Demokratike dhe vetëm në 25 prill ka votuar për herë të parë.
Në lidhje me kreun e degës PD Fier, nuk kam problem me asnjë emër por për procedurën që po përdoret. Emërimet dhe rekomandimet nuk janë asnjëherë të vlefshme. Kam fituar me 12 kandidatë të tjerë. Jam i gatshëm edhe sot të votëbesohem dhe jam i sigurt që fitoj mbi 70 % të votave. Jam pro lëvizjeve, pasi dega Fier ka resurse që të dalin kandidatë shumë herë më mirë por asnjëherë me emërime apo rekomandime.
Vendime që nuk merren nga strukturat e degës janë vendime që na çojnë humbje pas humbje. Nuk është mëkat që të pranojmë vendimet e gabuara. Që nga kryetarët e degëve dhe deri te kryetari i PD. PD ka nevojë për një riformatim, një ringritje për të qenë të fortë kundër armikut të përbashkët Edi Rama. Basha është pjesë e PD është kryetari aktual por kjo s’ka pse ta pengojë atë ti nënshtrohet votës si çdo drejtues tjetër” deklaroi ai. / Abcnews.al
