Edhe pse sot ishte njoftuar bojkotim I seancave gjyqësore, pesë procese për caktim mase sigurie në gjykatën penale të Tiranës janë zhvilluar.
Avokatët kanë marrë pjesë në seancën e së enjtes duke thyer bojkotin e lajmëruar një ditë më parë nga dhoma kombëtare e avokatisë për të kundërshtuar hartën e re gjyqësore.
Në seancë kanë marrë pjesë disa nga avokatët e listës për mbrojtjen e detyrueshme të caktuar nga gjykata, por edhe avokatë të zgjedhur nga të arrestuarit.
Nga ana tjetër të gjitha proceset për gjyqet e themelit nuk janë zhvilluar. Në mbledhjen e së mërkurës këshilli i dhomës kombëtare të avokatisë vendosi të bojkotojë të gjitha seancat gjyqësore pa afat, ndërsa masat e sigurisë me afat 10 ditor, pasi KLGJ shkriu 18 gjykata në vend dhe ky propozim pritet të miratohet nga ministria e drejtësisë dhe ajo e financave.
Në vendimin e djeshëm, dhoma kombëtare e avokatisë njoftoi se do të merren masa disiplinore për avokatët që do të thyejnë bojkotin, por kjo nuk i ka penguar disa prej tyre të ndjekin seancat.
Fillimisht dhoma kombëtare e avokatisë, bojkotoi seancat për katër ditë duke kërkuar nga KLGJ të rishikonte projektin përfundimtar. Më pas seancat iu rikthyen normalitetit, por protesta vazhdoi vetëm në apelin e Korçës, Vlorës, Durrësit, Gjirokastrës e Shkodrës, si dhe rrethe të tjera që do të mbyllen nga harta e re gjyqësore./Abcnews.al/
