Policia në kryeqytetin e Zvicrës evakuoi Parlamentin dhe zyrat e lidhura të martën pasi një burrë me jelek antiplumb u arrestua pranë njërës prej hyrjeve të tij dhe u zbulua se mbante eksploziv. Policia e Bernës tha në një deklaratë se ai u vu re në hyrjen e parlamentit dhe sjellja e tij ishte e dyshimtë.
Pas një kontrolli në trup, atij iu gjet eksploziv. I dyshuari, i cili nuk është identifikuar, po i nënshtrohej ekzaminimeve fizike dhe mendore, thuhet në deklaratë. Prokurorët dhe policia federale hapën një hetim penal. Ndërkohë, nuk ka ende asnjë të dhënë specifike për një motiv të mundshëm.
Policia rrethoi Sheshin Federal jashtë ndërtesës së parlamentit dhe rrugëve aty pranë për disa orë ndërsa dërgoi ekipe sigurie, duke përfshirë skuadrat e zjarrit dhe ekspertë të çminimit, të mbështetur nga një qen policie dhe drone për të inspektuar një makinë të braktisur që ishte e lidhur me të dyshuarin.
Masat e sigurisë janë hequr pasi rezultoi se mjeti nuk përbënte rrezik, thuhet në njoftimin e policisë. Zvicra rrallë ka pasur ndonjë përplasje me dhunën ekstremiste, por policia federale ka paralajmëruar rregullisht për kërcënimin./abcnews.al
