Policia federale e Argjentinës ka arrestuar një “boss” të mafies italiane në periferi të Buenos Aires, tha agjencia e sigurisë në një deklaratë të hënën.
Ai ishte në kërkim prej vitesh.
Carmine Alfonso Maiorano, një udhëheqës 68-vjeçar i mafies italiane “Ndragheta” u kap të mërkurën e kaluar në qytetin Guernica në provincën e Buenos Aires, thuhet në deklaratë.
Maiorano me origjinë italiane është akuzuar nga autoritetet ndërkombëtare për kryerjen e operacioneve të trafikut të drogës dhe armëve midis Amerikës Latine dhe Evropës.
Organizata Ndërkombëtare e Policisë Kriminale, e njohur si Interpol, e konsideron “Ndraghetan” si një nga organizatat kriminale më të fuqishme në botë.
Një urdhër-arresti ndërkombëtar u lëshua për Maioranon në vitin 2015.
Mafia “Ndragheta” u vendos në Argjentinë disa vite më parë, thuhet në deklaratën e policisë, duke vepruar së bashku me homologët shqiptarë në Evropë.
I arrestuari është vënë në dispozicion të Gjykatës Federale Penale dhe Korrektuese të Argjentinës./Abcnews.al.
