Të paktën shtatë civilë kanë mbetur të vrarë dhe 17 të tjerë janë plagosur si pasojë e bombardimeve të rusëve në Kharkiv, Ukraina verilindore. Shifrat i kanë bërë publike autoritetet lokale në vend.
Më herët gjatë ditës së sotme u raportua se të paktën pesë persona kishin humbur jetën dhe 10 ishin të plagosurit, mes tyre edhe një fëmijë, nga bombardimet që goditën qytetin e dytë më të madh të Ukrainës.
Guvernatori i rajonit të Kharkiv-it, Oleh Synehubov, raportoi për luftime të ashpra në veri dhe veri-lindje të qytetit.
Ai tha: “Armiku po godet sërish në mënyrë tinëzare popullsinë civile, duke i terrorizuar.”
Deklaratat nuk janë verifikuar në mënyrë të pavarur. /abcnews.al/
