Loading ...
Arabia Saudite dyshohet se ka bllokuar ose vonuar transfertat bankare drejt llogarive në Emiratet e Bashkuara Arabe, një zhvillim që po ngre shqetësime se tensionet politike mes dy vendeve të Gjirit po reflektohen tashmë edhe në marrëdhëniet ekonomike.
Sipas një raportimi të Financial Times, që nga muaji maj, një numër pagesash të dërguara nga bankat saudite drejt llogarive të kompanive dhe individëve në Dubai janë kthyer mbrapsht ose janë mbajtur pezull, shpesh pa asnjë shpjegim zyrtar.
Një drejtues i një kompanie perëndimore të kujdesit shëndetësor me bazë në Dubai deklaroi për gazetën britanike se bankat saudite kanë refuzuar disa pagesa nga një klient afatgjatë saudit, duke krijuar vështirësi në aktivitetin e biznesit.
Megjithatë, Banka Qendrore e Arabisë Saudite ka mohuar zërat për kufizime të qëllimshme, duke deklaruar se nuk ka vendosur “kufizime të drejtpërdrejta ndaj vendeve të caktuara”.
Zhvillimi vjen në një kohë kur marrëdhëniet mes Arabisë Saudite dhe Emirateve të Bashkuara Arabe po përballen me mosmarrëveshje në disa çështje rajonale. Edhe pse prej vitesh konsiderohen aleatë strategjikë, të dy vendet kanë shfaqur qëndrime të ndryshme për tema të rëndësishme të politikës së jashtme, përfshirë raportet me Izraelin.
Nëse raportimet konfirmohen, kufizimet ndaj transfertave bankare mund të kenë ndikim të drejtpërdrejtë në një nga marrëdhëniet më të rëndësishme tregtare në rajonin e Gjirit.
