Atalanta-Liverpool është një nga takimet më interesante të ditës së martë në Champions League. Dy ekipe që preferojnë të luajnë një futboll të hapur dhe sulmues, edhe pse djemtë e Jurgen Klopp janë favoritët për të siguruar tre pikët.
Trent Alexander-Arnold, mbrojtësi i djathtë dhe një nga pikat më të forta të “The Reds”, thur elozhe për kundërshtarët në konferencën e zakonshme për shtypin. 22-vjeçari e di që kundër ekipeve italiane nuk është kurrë e thjeshtë të përballesh, teksa vlerëson ofensivën e zikaltërve.
“Atalanta është një skuadër e jashtëzakonshme, e kanë treguar veten edhe sezonin e kaluar. Kanë një forcë të pabesueshme në sulm dhe e kam të vështirë të zgjedh një apo dy lojtarët më të mirë të tyre. I kemi studiuar në kompleks si skuadër.
Kjo është hera e parë që luajmë kundër tyre, është gjithmonë e vështirë të përballesh dhe të fitosh me ekipit italiane, pasi janë shumë të organizuara në mbrojtje. Duhet të gjejmë një zgjidhje për t’i mposhtur dhe për të marrë tre pikët“, deklaron Alexander-Arnold. /abcnews.al
