Gjatë një takimi me të rinj të Durrësit, teksa prezantoi kandidatin Luan Hoti për zgjedhjet e 6 marsit, kreu i Partisë Demokratike Lulzim Basha u ndal edhe te projekti i portit të Durrësit.
Basha u zotua se do ta çojnë deri në fund denoncimin e tyre, siç bënë me inceneratorët. Një përgjigje i dha edhe ish-kryeministrit Sali Berisha, i cili e akuzon vazhdimisht se bashkëpunon e Ramën për këtë aferë. Basha tha se nuk ka ndërmend të merret, pasi ndërsa e akuzon këtë të fundit, natën takohet me Vangjush Dakon. Largimi i modelit të vjetër ishte kryefjala e kryedemokratit përpara të rinjve durrsakë.
“Gënjeshtra tjetër është ajo që po bëhet me portin e Durrësit. Edhe këtë do ta çmontojmë. 6 vjet më parë nisëm denoncimet për inceneratorët, sot po dridhen. Aferën e portit të Durrësit që e kemi denoncuar do ta çojmë deri në fund. Nuk do ta lëmë Durrësin pa zhvillim. Dhënia e portit të Durrësit pa garë një arabi që në fakt u shërben disa oligarkëve. Pala tjetër thotë se ky është projekti Rama-Basha ndërkohë që natën takohet me Dakon. Unë nuk kam ndërmend që të merren me baltën që hedh modeli i vjetër. Ne do merremi me fakte. Pa transparencë nuk ka zhvillim.
Nuk mund të ketë zhvillim me një projekt që nuk dihet si lindi, sa do të fitojnë qytetarët. Nuk e di askush se modeli i vjetër i mban të mbyllura në kasafortë. Do tua çajmë siç ua çamë kasafortën e inceneratorëve. Modeli i vjetër do të vazhdojë të dominojë edhe 30 vjet të tjera. duan edhe 30 vjet të tjera ta qeverisin kështu Shqipërinë”, deklaroi Basha. g.v/abcnews.al
