Dy partitë më të mëdha nuk janë të kënaqura me rolin e vëzhguesit, që i jep Komisioni Qendror i Zgjedhjeve, në tavolinat numërimit të votave nga Diaspora. Këtë të hënë, Komisioni Rregullator diskutoi projektvendimin që parashikon që numërimin e votave të diasporës ta bëjnë njerëz jo politikë, të përzgjedhur nga KQZ.
“Nuk jam dakord me termin “anëtar vëzhgues”, është shprehur Elena Xhina, përfaqësuese e PS.
“Ivi Kaso, Përfaqësues i PD: Në asnjë gërmë nuk i jepet leje kreative KQZ-së që të shpikë një proces të ri, teksa Kodi Zgjedhor ka rregulla për të gjithë procesin. Nuk jeni të autorizuar të shpikni procedurë krejt të re, ndryshe nga ajo e shqiptarëve që votojnë brenda vendit. Të jetë e njëjtë si brenda vendit”, ka thënë përfaqësuesi i PD Ivi Kaso.
Kryetarja e Komisionit Rregullator, Ilirjana Nano nuk pati një përgjigje për këtë kundërshtim të dy përfaqësuesve të PS dhe PD.
“PS e PD t’i kishin sjellë mendimet me shkrim. Janë pyetur në 12 nëntor”, shtoi më tej Ilirjana Nano, kryetare e Komisionit Rregullator.
Sipas propozimit të KQZ, Grupet e Numërimit të Votave nga Jashtë përbëhen secili nga 2 anëtarë, që caktohen nga KQZ.
Mos/dakordësia këtë të hënë bëri që vendimmarrja e KQZ të shtyhet për ditët në vijim, ndërkohë diskutim pati dhe për vendndodhjen ku do të bëhet numërimi i votës së diasporës.
/abcnews.al/
