Max Allegri, trajneri i Juventusit, ka dale para mediave një ditë para ndeshjes ndaj Udinese. Ai ka folur për rivalin e javës së parë dhe më pas në qendër të vëmendjes kanë qenë edhe emra të veçantë, Cristiano Ronaldo e Paulo Dybala. Në fund ai flet edhe për objektivin titull.
UDINESE – “Siç e kam thënë gjithmonë, ndeshja e parë është e vështirë. Sidomos kur luan ndaj Udinese, një ekipi të fortë fizikisht. Ata nuk kanë pësuar asnjë gol nga goditjet e këndit sezonin e shkuar, janë të mirë në kundërsulm dhe organizohen mirë prapa”.
MESFUSHA – “Ramsey po përmirësohet dhe është një pozicion i mirë për të në mesfushë, pasi nuk është se i duhet të vrapojë shumë. Jam i lumtur me faktin që erdhi Locatelli, por atij i duhen edhe 10 ditë për t’u bashkuar me pjesën tjetër të grupit. Nëse është i nevojshëm nesër, ai mund të luajë ndoshta 15 minuta”.
CR7– “Ronaldo nuk luajti të enjten kundër Juventus U23 sepse po dilnim nga një ngarkesë e madhe stërvitore dhe i dhashë gjysmë dite pushim. Ronaldo është një bonus për ne, pasi garanton një numër të madh golash. Natyrisht edhe ne duhet të punojmë si ekip për të nxjerrë më të mirën nga një individ. CR7 gjithmonë është stërvitur mirë. Kam lexuar vetëm thashetheme në gazeta. Ai kurrë nuk na ka thënë ne se do të largohet. Ronaldo më tha mua se do të qëndrojë te Juventusi”.
DYBALA – “Paulo është rikthyer në stërvitje dhe po sillet sikur të ishte viti i tij i parë te Juventusi. Ai gjithashtu e di se dy sezonet e fundit nuk ishin në nivelin e potencialit të tij. Ai është i talentuar, por duhet të stërvitesh me një intensitet të caktuar nëse doni të luani në një nivel të caktuar. Paulo do të jetë kapiteni nesër, nëse luan”.
TITULLI KAMPION – “Duhet të kuptojmë që për të fituar titullin kampion, duhet të punojmë fort në aspektin fizik, teknik dhe mendor. Nëse jemi ende në garë për titull në mars, atëherë do të thotë që ekipi e ka gjetur bilancin. Zakonisht favorite është skuadra që e fitoi herën e fundit.
Le të hedhim hapin e parë dhe të përpiqemi të fitojmë ndeshjen e parë. Nuk ndjej se kam diçka për të provuar. Çfarë kam bërë në pesë vite qëndron në muze. Duhte të sfidojmë veten çdo ditë, ndryshe nuk do të jemi në gjendje të fitojmë.
Është e njëjta gjë për Cristiano Ronaldon. Ai fitoi 5 “Topa të Artë”, por nëse ka një sezon të keq, njerëzit atë do të mbajnë mend. E njëjta gjë vlen edhe për Federico Chiesa, ajo që bëri në EURO 2021 nuk ka më rëndësi”, shprehet Allegri. / abcnews.al
