Në muajin shkurt, kur ishte edhe kulmi i pandemisë në vendin tonë në spitalin Sanatorium trajtoheshin rreth 250 pacientë të prekur me COVID, ndërsa sot numri i tyre ka shkuar në 2 ose 3.
Mjeku Arjan Mezini deklaroi në një intervistë me gazetaren Juli Xhokaxhi në ABC se deri në fund të javës ky spital pritet të zbrazet tërësisht nga pacientët e prekur me COVID, për t’i lënë vendin atyre me sëmundje pulmonare dhe kronike si dhe pacientëve që e kanë kaluar sëmundjen e COVID dhe kanë mbetur me pasoja në shëndet.
Mezini deklaroi se Shqipëria sot është në një situatë optimale sa i përket pandemisë kjo për shkak të uljes së shifrave, imunizimit, fushatës së vaksinimit dhe stinës ku ndodhemi.
“Kanë ngelur dy tre pacientë që besoj që deri nga fundjava do të dalin dhe Sanatoriumi po bëhet gati të presë pacientët e mëparshëm me sëmundje pulmonare dhe të tjerë që kanë pasoja pasi janë shëruar nga COVID.
Shqipëria është në një situatë optimale sa i përket infeksioneve me COVID. Pavarësisht shifrave, virusi qarkullon sërish mes nesh. Dy janë faktorë kryesorë: Imunizimi natyral dhe fushata e vaksinimit. E treta: Jemi në periudhë stinore ku infeksionet virale nuk janë të favorizuar.
Duhet të jemi vigjilent. Le të presim sezonin e vjeshtë dimrit që mund të ketë një rritje të lehtë të numrave. Situata është më ndryshe se vjet. Kur filloi pandemia deri në maj kemi pasur një karantinë të fuqishme. Vera nuk mund të krahasohet me muajt e dimrit kur në spitale ku nuk kishte edhe vende. Vigjilenca duhet ruajtur” u shpreh Mezini.
Mjeku theksoi se nuk duhet të trembemi përballë mutacioneve duke shtuar se pavarësisht transmetueshmërisë më të lartë, ata nuk janë ma agresive. Ai tha se ka pasur raste kur imuniteti te personat e vaksinuar apo tek ata që e kanë kaluar COVID ka zgjatur deri në 1 vit.
“Nuk duhet të frikësohemi por duhet të jemi të kujdesshëm. Deri tani është raportuar se varianti indian është 40% më transmetues por nuk është raportuar që të jetë më agresiv. Deri tani po shihet që imuniteti ka shkuar deri në 1 vit si në rastin e imunitetit natyral edhe tek të vaksinuarit.
Çdo vaksinë ndihmon. Rastet që kanë qenë të vaksinuar dhe janë prekur në botë e kanë kaluar lehtë dhe pa komplikacione. Një nga klinikat tona ka përballuar fluks të fortë të pacientëve me sëmundje kronike dhe për fat ia kanë dalë.
Shumë pacientë kronikë unë i kam konsultuar përmes telefonit pasi ishin të stepur për t’iu drejtuar spitalit. Jemi në procesin e dezinfektimit të spitalit. Aparatet kanë një procedurë dezinfektimi. Në fundjavë mund të përfundojë ky proces. COVID ka pasoja të ndryshme. Pasojat në mushkëri zgjasin 3-6 muaj”, u shpreh ai.
Ai veçoi një nga momentet e vështira në punë gjatë pandemisë, kur ndërroi jetë piktori Mustafa Arapi i cili pavarësisht se ndodhej në intubim në dukje, parametrat e tij jetësorë dukeshin në përmirësim e sipër.
“Jemi në mangësi mjekësh dhe infermierësh. Duhet të gjejmë një rrugë që ata të shohin vendin e tyre të punës si atraktiv. Kam trajtuar piktorin Mustafa Arapi. Erdhi në gjendje shumë të rëndë. U lajmëruar në mëngjes që brenda 10 minutash kishte ndërruar jetë. Ai po shkon në rikuperim dhe papritur ndodhin komplikacione të tilla që të demoralizojnë. Kemi pasur pacientë shumë të rëndë që mendonim se nuk ia dilnin dot.
Mesatarja e orëve të punës ka qenë e ndryshme në periudha të ndryshme. Nisja ka qenë një periudhë shumë e vështirë në stinën e verës. Periudha e dytë ka qenë nëntori dhe shkurti kur ti mund të rrije në punë deri në 10 të darkës”, deklaroi Mezini. m.v/abcnews.al
