Presidenti i Bjellorusisë, Aleksandër Lukashenko ka reaguar për herë të parë pas rrëmbimit të avionit me urdhër të tij, me qëllim arrestimin e gazetarit Raman Pratasevich. Lukashenko ka folur në një një seancë parlamentare mëngjesin e sotëm dhe ka sulmuar shtetet perëndimore që ndërmorën sanksione ta ashpra ndaj vendit të tij.
Në fjalën e tij, Lukashenko tha se sulmet ndaj Bjellorusisë kanë kaluar vijat e kuqe, përcjell abcnews.al.
“Siç e parashikuam, keqdashësit tanë brenda dhe jashtë vendit kanë ndryshuar metodat e tyre për të sulmuar shtetin. Ata kanë kapërcyer shumë vija të kuqe dhe kanë kapërcyer kufijtë e arsyes së përbashkët dhe moralit njerëzor,” tha Lukashenko ndërsa iu drejtua anëtarëve të parlamentit, njoftoi agjencia shtetërore e lajmeve Belta.
Lukashenko e quajti gjithashtu gënjeshtër absolute se një avion luftarak e detyroi avionin të ulej dhe tha se Bjellorusia kishte vepruar “në mënyrë të ligjshme, për të mbrojtur njerëzit”, duke theksuar se pati alarm për bombë.
“Unë veprova ligjërisht për të mbrojtur popullin tonë,” tha ai, duke akuzuar gjithashtu Pratasevich për planifikimin për të filluar një “rebelim të përgjakshëm”.
Çfarë ndodhi me avionin?
Të dielën, autoritetet bjelloruse detyruan avionin e kompanisë Ryanair të ulej ndërsa po fluturonte për në kryeqytetin lituanez, Vilnius dhe ishte nisur nga Athina.
Me të zbritur në Minsk, autoritetet bjelloruse arrestuan gazetarin Raman Pratasevich dhe të dashurën e tij, Sofia Sapega. Pratasevich, kritik i zëshëm i Lukashenkos, po udhëtonte nga Greqia në Lituani.
Minsk urdhëroi që avioni, i cili fluturonte mbi hapësirën e tij ajrore të ulej, duke pretenduar se një bombë ishte në bord, por rezultoi se ishte e rremë. Gjithçka ishte plan për të arrestuar gazetarin.
BE u përgjigj me sanksionet ndaj Bjellorusisë, duke përfshirë ndalim të linjave ajrore bjelloruse që të përdoerin hapësirën ajrore të BE-së ose aeroportet.
Ndërkohë, opozita bjelloruse po përgatitet të zhvillojë një fazë të re të protestave aktive anti-qeveritare në Bjellorusi, tha liderja e opozitës në mërgim Sviatlana Tsikhanouskaya.
Protestat masive shpërthyen kundër Presidentit Alexander Lukashenko verën e kaluar pasi ai deklaroi fitoren në zgjedhjet presidenciale që kundërshtarët e tij thanë se ishin të manipuluara. Protestat u ngadalësuan pas një goditjeje të gjerë të zbatuar nga autoritetet. g.v/abcnews.al
