Policia e Malit të Zi ka arrestuar kreun e dyshuar të një bande kriminale e cila ka përhapur frikë dhe gjakderdhje në Ballkan dhe në të gjithë Evropën. Mediat bëjnë me dije se arrestimi i shtetastit Sllobodan Kashçelan ndodhi në qytetin bregdetar të Kotorrit.
Arrestimi i tij është përshëndetur nga zëvendëskryeministri, Dritan Abazoviç, duke e cilësuar si suksesin më të madh të policisë në 10 vitet e fundit.
Kashqelan, 58 vjeç, u arrestua nën dyshimet për organizim të grupit kriminal që ka kryer dhe po planifikonte akte të rënda kriminale, thanë mediat e Malit të Zi.
Kashqelan supozohet se është udhëheqës i një klani kriminal, i cili që nga viti 2015 është përfshirë në një luftë të përgjakshme me një bandë rivale malazeze për kontrollin e kontrabandës së kokainës nga Amerika e Jugut.
Dy bandat kishin filluar sulme vdekjeprurëse kundër njëra-tjetrës në Mal të Zi, Serbi dhe Bosnjë dhe Hercegovinë, si dhe në vendet evropiane Greqi, Spanjë dhe Itali. Kashqelan i ka mbijetuar dy përpjekjeve për vrasje, përfshirë atë të vitit 2016 kur ai u plagos rëndë në qytetin verior serb të Novi Sadit.
Qeveria e re e Malit të Zi që fitoi pushtetin pas zgjedhjeve parlamentare në gusht të vitit 2020 është zotuar se do të çrrënjosë krimin dhe korrupsionin. Zëvëndëskryeministri, Abazoviç, tha se arrestimi i Kashqelan është vetëm fillimi i luftës së qeverisë kundër krimit./abcnews.al
