Në portin e Durrësit janë sekuestruar 49 kilogramë kokainë në një kontejner me banane që vinte nga Ekuadori. Burime nga policia bëjnë me dije se lënda narkotike është sekuestruar pas finalizimit të operacionit i koduar “MERSIN”.
Policia njofton se si rezultat i operacionit, gjatë kontrollit të imtësishëm të ushtruar në disa kontenierë, u bë e mundur që në njërin prej tyre, i cili ishte i ngarkuar me banane dhe ishte nisur nga Ekuadori me destinacion Shqipërinë, për llogari të një firme me qendër në Maminas, me administrator shtetasin Selim Çekaj të gjendej dhe sekuestrohej në cilësinë e provës materiale rreth 49 kilogramë lëndë narkotike e dyshuar kokainë.
Policia ka arrestuar administratorin e firmës banues në Sauk, Tiranë. Mësohet se Selim Çekaj, është babai i Arbër Çekajt i arrestuar po ashtu për trafikim kokaine.
Ky i fundit është në qeli pasi u kapën 613 kg kokainë po në kontejnerë me banane për llogari të firmës së tij që vinin nga Kolumbia në vitin 2018.
Njoftimi i plotë i policisë:
Finalizohet operacioni i koduar “MERSIN”.
Operacioni i zhvilluar në Portin e Durrësit, nga strukturat e Policisë së Shtetit, në bashkëpunim me autoritetet doganore në Port Durrës.
Sekuestrohen rreth 49 kilogramë lëndë e dyshuar narkotike kokainë.
Arrestohet në flagrancë poseduesi i lëndës narkotike.
Strukturat e Policisë së Shtetit, në vijim të punës për parandalimin, evidentimin dhe goditjen e trafikimit të lëndëve narkotike, bazuar në informacionet e marra në rrugë operative dhe hetimet e kryera se në një kontenier fshihej një sasi e konsiderueshme lënde narkotike kokainë, në bashkëpunim me autoritetet doganore kanë organizuar dhe finalizuar operacionin policor të koduar “MERSIN”.
Si rezultat i operacionit, gjatë kontrollit të imtësishëm të ushtruar në disa kontenierë, u bë e mundur që në njërin prej tyre, i cili ishte i ngarkuar me banane dhe ishte nisur nga Ekuadori me destinacion Shqipërinë, për llogari të një firme me qendër në Maminas, me administrator shtetasin S. Ç., të gjendej dhe sekuestrohej në cilësinë e provës materiale rreth 49 kilogramë lëndë narkotike e dyshuar kokainë.
Në vijim të veprimeve, nga Seksioni për Hetimin e Narkotikeve në DVP Durrës u arrestua në flagrancë shtetasi S. Ç., banues në Sauk, Tiranë.
Nën drejtimin e Prokurorisë së Rrethit Gjyqësor Durrës, vijon puna për dokumentimin e plotë të kësaj ngjarjeje, identifikimin dhe kapjen e autorëve të tjerë të përfshirë në këtë veprimtari kriminale.
Për arsye hetimore nuk jepen detaje të tjera rreth operacionit.
Materialet i kaluan Prokurorisë së Rrethit Gjyqësor Durrës, për veprime të mëtejshme.
g.v/abcnews.al
