Arbitrat shqiptarë rikthehen në arenën e madhe të futbollit. Enea Jorgji është zgjedhur nga UEFA për të vënë drejtësi në ndeshjen Armeni-Islandë, e vlefshme për grupin J të eliminatoreve të Botërorit të vitit të ardhshëm.
Kjo zgjedhje e arbitrit elbasanas vjen pas gjykimit të miqësores mes Lituanisë dhe Kosovës, e përfunduar me shifrat 4-0 për dardanët. I gjithë ekipi i arbitrave do të jetë shqiptar, pasi Jorgji do të ketë me vete edhe kolegët e tij të linjës, Ridiger Çokaj dhe Rejdi Avdo, si dhe Juxhin Xhajën si arbitër të katërt.
Të gjithë këta gjyqtarë kanë stemën e arbitrave të FIFA-s. Ndeshja do të luhet nesër në 18:00 në Jerevan, kryeqytetin e Armenisë. Në këtë sezon Jorgji ka gjykuar edhe në Ligën e Kombeve dhe eliminatoret e Europa League. Në sezonin e shkuar ai gjykoi në dy ndeshje të fazës së grupeve të Europa League. /abcnews.al
