Loading ...
LEZHË – Është nxjerrë nga makina i vdekur shoferi i “Benz-it” që u përplas me një kamion në aksin Shkodër-Lezhë pranë kryqëzimit të Dajçit. Mësohet se viktima i identifikuar si Eduard Grishaj 55 vjeç, udhëtonte i vetëm në makinë, ndërsa ka gjetur vdekjen e menjëhershme në vendin e ngjarjes pas përplasjes së fortë.
Gazetari i ABC, Gjergj Figuri sjell pamjet e aksidentit. Makina tip “Benz” me targë “SH 6549 E” është futur poshtë kamionit duke u bërë “petë”.
Është dashur ndërhyrja me fadromë duke ngritur kamionin, për të nxjerrë trupin e pajetë. ABC mëson se kamioni po dilte nga superstrada në një rrugë dytësore për në fshatin Dajç, ku autovetura ka goditur në pjesën e fundit kamionin dhe është futur poshtë tij duke u bërë “petë”.
Ndërkohë po punohet për zbardhjen e plotë të këtij aksidenti.
Njoftimi i policisë:
Rreth orës 20:00, në aksin rrugor Lezhë-Shkodër ,në vendin e quajtur “Kryqëzimi i Dajçit “, mjeti tip “Benz” është përplasur me mjetin kamion, ku për pasojë ka ndërruar jetë në vend drejtuesi i mjetit tip “Benz” ende i paidentifikuar .
Drejtuesi i kamionit shtetasi T.M., është shoqëruar në Komisariatin e Policisë Lezhë për veprime të mëtejshme.
Grupi hetimor në vendngjarje punon për sqarimin e plotë të shkakut dhe rrethanave të ngjarjes.
