Ish-trajneri i Milanit dhe Juventusit, Massimiliano Allegri, është shumë pranë rikthimit në stol. Italiani, i cili ka qënduar një vit pushim, është lidhur këtë herë me stolin e Lazios sipas raportimit të “Il Messaggero”. Është presidenti Claudio Lotito ai që e kërkon atë për pankinën e klubit të tij, për shkak se ata nuk po gjejnë një marrëveshje me Simone Inzaghin.
Presidenti është shumë i kënaqur me punën e trajnerit aktual, i cili e ktheu Lazion në Champions League, dhe i ka ofruar atij një kontratë 3-vjeçare. Megjithatë tekniku ende nuk ka pranuar dhe vetëm e ka shtyrë takimin për rinovimin e kontratës.
Nëse Inzaghi nuk pranon rinovimin, atëherë Lotito do ta shikojë si mundësi reale firmën me Allegrin. Ndërkohë ky i fundit është lidhur shpesh me klubin e Romës, pasi dhe ata nuk janë të kënaqur me Fonsekën. Mbetet për t’u parë se si do të shkojë situata e tij, por Serie A duhet të përgatitet për rikthimin e Max Allegrit. /abcnews.al
