Qyteti brazilian i Manaus, i cili u godit rëndë nga pandemia e koronavirusit, ka pasur aq shumë të infektuar sa që popullsia e tij mund të ketë arritur “imunitetin e tufës”, sipas një studimi paraprak.
I botuar në faqen e internetit medRxiv, studimi analizoi të dhënat e infeksionit me modelimin matematikor për të vlerësuar se 66 përqind e popullsisë kishin antitrupa ndaj koronavirusit të ri në Manaus , ku kalimi i pandemisë ishte aq i shpejtë sa edhe brutal.
Kjo mund të ketë qenë e mjaftueshme për të arritur pragun e imunitetit të tufës, në të cilën mjaft anëtarë të një popullate janë imune ndaj një sëmundjeje që nuk mund të përhapet më në mënyrë efektive, thanë autorët e studimit, një grup prej 34 studiuesve brazilianë dhe ndërkombëtarë, shkruan abcnews.al.
“Shkalla jashtëzakonisht e lartë e infeksionit sugjeron që imuniteti i tufës luajti një rol të rëndësishëm në përcaktimin e madhësisë së epidemisë”, shkruhet në studim, i cili ende nuk i është nënshtruar rishikimit të kolegëve.
“Të gjitha shenjat tregojnë se ishte fakti i të qenit kaq i ekspozuar ndaj virusit që solli zvogëlimin e numrit të rasteve të reja dhe vdekjeve në Manaus”, ka thënë koordinatori i studimit, profesori i mjekësisë në Universitetin e Sao Paulos, Ester Sabino.
I ndodhur në pyjet e Amazonës, Manaus ishte skena e imazheve të tmerrshme të spitaleve, varreve masive dhe kufomave të grumbulluara në kamionë frigoriferë kur pandemia ishte në kulmin e saj atje, në maj.
Por vdekjet në qytetin me 2.2 milion njerëz kanë rënë në mënyrë dramatike javët e fundit, në një mesatare prej vetëm 3.6 në ditë gjatë 14 ditëve të fundit.
Manaus tani është një nga qytetet që hapet më shpejt nga bllokimi në Brazil, vendi me numrin e dytë më të lartë të vdekjeve në të gjithë botën, pas Shteteve të Bashkuara, me gati 139,000 njerëz të vrarë. g.v/abcnews.al
