Grupet kryesore politike të Parlamentit Evropian, kanë konfirmuar të martën se nuk e njohin Aleksandër Lukashenkon si president të rizgjedhur të Bjellorusisë, dhe atë e konsiderojnë si “persona non-grata” në Bashkimin Evropian.
Në deklaratën e përbashkët, ata konsiderojnë se zgjedhjet presidenciale të 9 gushtit “nuk ishin as të lira, as të drejta”, ndërsa, sipas tyre, raportet e besueshme tregojnë për një fitore të lideres opozitare, Svetlana Tikhanovskaya.
Deklaratën e përbashkët e kanë nënshkruar shefat e grupit të Partive Popullore, Socialdemokratëve, Liberalëve, të Grupit të të Gjelbërve si dhe konservatorëve dhe reformistëve evropianë.
Megjithatë në mesin e nënshkruesve mungojnë përfaqësuesit e grupacioneve politike që i përkasin ekstremit së djathtë dhe të majtë, ndonëse ato janë më të vogla në numër.
Në deklaratën e përbashkët, përfaqësuesit e grupeve kryesore politike në Parlamentin Evropian përshëndesin popullin bjellorus për guximin dhe vendosmërinë e tyre si dhe mbështesin fuqishëm dëshirën e tyre për ndryshime demokratike dhe liri.
“Ne dënojmë fuqishëm arrestimet dhe aktet e tmerrshme të dhunës dhe torturave të kryera kundër protestuesve paqësorë dhe bëjmë thirrje për një hetim të plotë të këtyre krimeve, të cilat nuk mund të kalojnë pa u ndëshkuar,” kanë deklaruar grupet e Parlamentit Evropian.
Megjithatë, Parlamenti Evropian nuk ka autoritet që të shpallë dikë persona non-grata, meqë kjo çështje është në kompetencë të shteteve anëtare të BE-së. Shtetet anëtare të BE-së, në nivelin më të lartë politik, do ta shqyrtojnë situatën në Bjellorusi, më 19 gusht, përmes një video-konference. /abcnews.al/
