Drejtori i përgjithshëm i Milanit, Ivan Gazidis, ka vizituar sot skuadrën në ambientet stërvitore, së bashku me Maldinin. Pasi ka biseduar me futbollistët dhe trajnerin Pioli, Gazidis më pas ka folur pë kanalin zyrtar të klubit kuqezi, duke thënë: “Siç kemi thënë disa herë, Pioli ka qenë gjithmonë një kandidat për të ardhmen, për të zbatuar vizionin tonë për një Milan konkurrues dhe modern.
Sigurisht, si drejtor i përgjithshëm i klubit, kam për detyrë të vlerësoj të gjitha opsionet e mundshme për të mirën e Milanit, por kam një marrëdhënie të shkëlqyeshme me Stefanon dhe gjithmonë e kam konsideruar atë një profesionist të jashtëzakonshëm, një drejtues të vërtetë, dhe për këtë arsye një kandidat absolut për të drejtuar Milanin.
Kam pasur kontakte me kandidatët e tjerë të mundshëm në të kaluarën, por mendoj se ka pasur shumë spekulime në media, pasi asnjëherë nuk kemi nënshkruar ndonjë marrëveshje apo para-marrëveshje me ndonjë trajner tjetër përveç Stefano Piolit.
Rangnick? Unë mohoj se ka angazhime ekonomike apo penale për klubin. Përsëris, asnjë marrëveshje nuk është nënshkruar ndonjëherë me kandidatët e tjerë të mundshëm. Pioli është zgjedhja ime e parë si trajner dhe jam i lumtur që kemi siguruar aftësitë e tij për projekt që kemi para nesh.
Tani duhet të përqëndrohemi që të përfundojmë këtë sezon në një mënyrë pozitive, në mënyrë që të përgatitemi më mirë për sezonin tjetër, me kohën e vogël që kemi në dispozicion”, u shpreh Gazidis./abcnews.al
