Një politikan kryesor pro-pavarësisë katalanase ka akuzuar qeverinë spanjolle për përgjim në celularin e tij.
Roger Torrent, kryetari i parlamentit Katalanas, foli pasi detajet e spiunazhit të pretenduar u zbuluan në një hetim të përbashkët nga gazetat Guardian dhe El Pais.
Torrent tha që ishte provë e “spiunimit kundër kundërshtarëve politikë” në Spanjë. Nga ana tjetër, Madridi i ka mohuar akuzat.
Gazetat Guardian dhe El Pais raportuan se Torrent ishte paralajmëruar se telefoni i tij ishte në shënjestër vitin e kaluar duke përdorur Pegasus, një mjet përgjimi të krijuar nga Izraeli.
Prodhuesit e mjetit thonë se u shitet vetëm qeverive për të gjurmuar kriminelët dhe terroristët.
Duke folur të martën, Torrent bëri thirrje për një hetim të plotë mbi atë që ndodhi.
“Kjo është hera e parë që ne kemi konfirmim konkret të asaj që shumë prej nesh e dinin dhe ishin duke e mohuar … Ne e dinim se praktikat e paligjshme po drejtoheshin kundër kauzës së pavarësisë. Tani kemi prova të caktuara,” tha ai.
Zyra e kryeministrit spanjoll Pedro Sánchez mohoi akuzat.
Një zëdhënëse i tha agjencisë së lajmeve AFP se qeveria nuk ishte në dijeni se Torrent dhe një ish-ligjvënës katalunas “kishin qenë nënshtruar një sulmi hakerimi përmes telefonave të tyre celular”.
“Në Spanjë, çdo ndërhyrje në lidhje me një telefon celular bëhet gjithnjë me ligj,” tha ajo.
Përpjekja e Katalonjës për pavarësi e kanë zhytur Spanjën në krizën e saj më të madhe politike në 40 vjet. Rajoni e kishte pezulluar autonominë për gati shtatë muaj nga Madridi pas një përpjekje të dështuar për t’u shkëputur në 2017-ën.
Në tetor të vitit të kaluar, Gjykata Supreme e Spanjës dënoi nëntë politikanë dhe aktivistë katalanas me burgim për kërkesën për pavarësi. /abcnews.al
