Kriminelët po përdorin shërbimet e ushqimit në shtëpi për të transportuar drogë dhe mallra të tjera të paligjshme gjatë krizës së koronavirusit, tha organizata e Policisë, Interpol.
Interpol tha se kishte marrë raporte nga policia në Irlandë, Malajzi, Spanjë dhe Britani që tregonin se shoferet që kryenin dërgesa, transportonin droga të tilla si kokainë, marihuanë, ketaminë dhe ekstazi.
Bllokimet dhe kufijtë e lëvizjeve të njerëzve, të imponuara nga qeveritë në mbarë botën në përpjekje për të penguar përhapjen e virusit, kanë çuar në rritjen e kërkesës për shoferët e këtij lloji, shkruan U.SNews
Në fillim të këtij muaji, Policia Kombëtare Spanjolle identifikoi dhe arrestoi shtatë persona të veshur si shoferë që dërgonin ushqime në Alicante dhe Valencia, tha Interpol.
Ajo shtoi se ata që ishin të përfshirë u kapën duke shpërndarë kokainë dhe marihuanë me biçikletë, motor dhe makinë, gjatë dorëzimit nëpër shtëpi.
Në Irlandë, policia zbuloi 8 kg kokainë, si dhe dy armë të fshehura në kuti picash, shtoi Interpol.
Interpol tha se transportuesit në disa raste ishin maskuar si shoferë që dërgonin ushqime.
Zyrtarë të lartë të anti-drogës kanë thënë se bosët e drogës në Amerikën Latine kanë dërguar në Europë dërgesa me kokainë edhe pse epidemia e koronavirusit e ka ngadalësuar shumë tregtinë e ligjshme./abcnews.al
