Ndeshja derbi mes Interit dhe Milanit, i pati të gjitha. Zikaltërit dhe kuqezinjtë e Milanos na dhuruan një superndeshje, por në fund ishin të besuarit e Contes që triumfuan 4-2 me përmbysje.
Ibrahimovic bëri një pjesë të parë të shkëlqyer, duke asistuar një gol dhe duke shënuar një tjetër, për ta çuar Milanin në dhomat e zhveshjes me avantazhin 0-2. Fillimisht, gjiganti suedez asistoi për golin e Rebic, për të shënuar më pas vetë me kokë.
Edhe pse në disavantazh të dy golave, Interi nuk u dorëzua aspak dhe në pjesën e dytë, ishin të papërmbajtshëm. Brozovic dhe Vecino barazuan gjithçka brenda dy minutash (51′ 53′), ndërsa de Vrij në të 70-ën, përmbysi për Interin.
Në minutat e fundit, Ibrahimovic ishte shumë pranë barazimit, por tentativa e tij me kokë u ndal në shtyllë. Në këtë aksion, Lukaku niset në kundërsulm dhe pas një kombinimi me Moses, shënon golin e 17-të në Serie A me kokë. Interi ngjitet me këtë fitore në krye të klasifikimit, së bashku me Juventusin./abcnews.al
Serie A, java 23
Inter – Milan 4-2
Brozovic 51′, Vecino 53′, de Vrij 70′, Lukaku 90+4′ / Rebic 40′, Ibrahimovic 45′
