Loading ...
Tensione të forta janë regjistruar në Irlandën e Veriut, pasi qindra protestues bllokuan Garvaghy Road në Portadown për të penguar një paradë të Urdhrit të Portokalltë (Orange Order), e cila ishte lejuar të kalonte në këtë zonë për herë të parë pas 28 vitesh.
Parada, e lidhur me komunitetin protestant dhe unionist, u miratua pas një beteje të gjatë ligjore. Autoritetet vendosën kufizime të rrepta, duke lejuar pjesëmarrjen e jo më shumë se 35 personave dhe vetëm një emblemë në krye të kortezhit.
Megjithatë, banorë dhe protestues nacionalistë, kryesisht nga komuniteti katolik, u mblodhën në Garvaghy Road dhe bllokuan rrugën me zinxhir njerëzor, duke kundërshtuar kalimin e paradës.
Zona është një nga pikat më të ndjeshme të konfliktit historik në Irlandën e Veriut. Garvaghy Road dhe Portadown u shndërruan gjatë viteve 1990 në skenë të përplasjeve të dhunshme mes komuniteteve katolike dhe protestante. Për këtë arsye, itinerari i paradës ishte ndaluar që nga viti 1998, në periudhën kur u arrit Marrëveshja e së Premtes së Mirë.
Kryeministrja e Irlandës së Veriut, Michelle O’Neill, u bëri thirrje të gjitha palëve të ruajnë qetësinë dhe mbështeti të drejtën e banorëve të Garvaghy Road për të protestuar kundër paradës. Edhe autoritetet britanike dhe qeveria irlandeze kanë bërë thirrje për vetëpërmbajtje dhe shmangie të përshkallëzimit.
Policia deklaroi se nuk mund të garantonte sigurinë e paradës për shkak të numrit të madh të protestuesve që kishin bllokuar rrugën. Organizatorët protestantë, megjithatë, këmbëngulën se vendimi për zhvillimin e paradës duhet të zbatohet.
Përplasja ka rikthyer në vëmendje tensionet e vjetra mes komuniteteve katolike dhe protestante në Irlandën e Veriut, pavarësisht marrëveshjes së paqes të vitit 1998. Garvaghy Road mbetet një prej simboleve më të ndjeshme të kësaj ndarjeje.
