Loading ...
Dy persona u plagosën sot rëndë nga një shpërthim në një hidrocentral në jug të Zvicrës, njoftoi transmetuesi publik RSI.
Shpërthimi ndodhi pak pas orës 9:30 në hidrocentralin e vjetër Ritom në Piotta, në komunën e Quinto, kantonin jugor të Ticinos, raportoi RSI, duke cituar policinë kantonale.
Policia e përshkroi incidentin si një “aksident të rëndë në vendin e punës” që përfshin një pjesë të strukturës dhe konfirmoi se dy persona pësuan lëndime të rënda.
Nga informacionet e para mësohet se një pjesë e strukturës është shembur, ku dy persona janë përfshirë. Shkaku i shpërthimit nuk është bërë i ditur menjëherë.
Incidenti ndodhi në termocentralin e vjetër, i cili u ndërtua në vitin 1917 dhe është duke u rinovuar si pjesë e një rizhvillimi më të gjerë të objektit Ritom. Së fundmi në ndërtesë ishin instaluar makineri të reja elektrike.
Shërbimet e urgjencës u vendosën në një numër të madh, përfshirë zjarrfikësit, personelin e shpëtimit të Tre Valli Soccorso dhe një helikopter REGA.
Policia ka rrethuar zonën ndërsa operacionet e emergjencës kanë vazhduar.
Dëmi nuk është i dukshëm nga jashtë objektit.
