Loading ...
Sytë nuk janë vetëm organi i shikimit. Mjekët i konsiderojnë shpesh si një “dritare” të shëndetit, pasi ndryshime të ndryshme në pamjen e tyre mund të japin sinjale të rëndësishme për gjendjen e organizmit, përfshirë edhe shëndetin e zemrës dhe enëve të gjakut.
Në emision do të flasim me mjekun imazherist Luciano Bardhi për shenjat që mund të dallohen te sytë, kur ato janë të padëmshme dhe kur kërkojnë vlerësim të menjëhershëm mjekësor.
Një e bardhë e syrit që merr ngjyrë të verdhë mund të jetë shenjë e rritjes së bilirubinës dhe të lidhet me probleme të mëlçisë, tëmthit ose të gjakut. Ndërkohë, skuqja e syve mund të vijë nga alergjitë, infeksionet, tharja e syrit ose irritimet e zakonshme.
Por nëse shoqërohet me dhimbje të forta, ndjeshmëri ndaj dritës apo ulje të shikimit, kërkon kontroll urgjent.
Edhe ndryshimet më të vogla nuk duhen neglizhuar. Sytë e fryrë ose të dalë përpara mund të lidhen me çrregullime të gjendrës tiroide, ndërsa tharja e vazhdueshme e syve mund të jetë pasojë e përdorimit të zgjatur të ekraneve, mjedisit, disa medikamenteve apo edhe sëmundjeve autoimune.
Po aq të rëndësishme janë edhe ndryshimet që zbulohen gjatë ekzaminimit të retinës. Ato mund të jenë tregues të diabetit, tensionit të lartë arterial apo dëmtimeve të enëve të gjakut. Pikërisht për këtë arsye, një kontroll rutinë i syve mund të ndihmojë në zbulimin e hershëm të sëmundjeve që prekin gjithë organizmin.
Në studio do të flasim edhe për një lidhje që shpesh nënvlerësohet: komunikimin mes zemrës dhe trurit përmes nervit vagus. Ky nerv është pjesë e sistemit nervor autonom dhe luan rol kyç në rregullimin e ritmit të zemrës, frymëmarrjes, tretjes dhe reagimit ndaj stresit.
Studimet tregojnë se frymëmarrja e ngadaltë dhe e kontrolluar mund të aktivizojë sistemin nervor parasimpatik, duke ndihmuar në uljen e përkohshme të frekuencës kardiake, reduktimin e tensionit nervor dhe përmirësimin e ndjesisë së relaksimit.
Një nga teknikat më të përdorura është marrja e frymës për rreth 4 sekonda dhe nxjerrja e saj ngadalë për 8 sekonda, duke e përsëritur ciklin për afërsisht 5 minuta, veçanërisht para gjumit. Kjo metodë nuk zëvendëson trajtimin mjekësor dhe nuk shëron sëmundjet e zemrës, por mund të jetë një mbështetje e vlefshme për mirëqenien fizike dhe mendore.
Po cilat janë shenjat që sytë na japin për shëndetin tonë? Kur duhet të alarmohemi? Si ndikon frymëmarrja në ritmin e zemrës dhe çfarë roli luan nervi vagus në këtë proces?
