Loading ...
Operatori portual DP World po planifikon ndërtimin e një porti të ri shumëfunksional dhe një terminali kontejnerësh në bregdetin lindor të Emirateve të Bashkuara Arabe, në një projekt që synon të anashkalojë Ngushticën e Hormuzit dhe të zvogëlojë varësinë e Dubait nga porti i tij kryesor, Jebel Ali.
Sipas Financial Times, kompania është në bisedime me autoritetet për zhvillimin e një porti të ri në Fujairah, në brigjet e Gjirit të Omanit, si dhe për zgjerimin e terminalit ekzistues në të njëjtin emirat.
Projekti konsiderohet një ndryshim i rëndësishëm në strategjinë logjistike të Emirateve, pasi do të lejojë që kontejnerët të hyjnë dhe të dalin nga vendi pa kaluar përmes Ngushticës së Hormuzit, një prej korridoreve detare më të rëndësishme në botë për transportin e naftës dhe mallrave.
Më pas, ngarkesat do të transportohen me rrugë tokësore drejt Dubait, Abu Dhabit dhe vendeve të tjera të Gjirit.
Planet vijnë pas luftës së fundit mes Shteteve të Bashkuara, Izraelit dhe Iranit, gjatë së cilës trafiku në Ngushticën e Hormuzit u ndërpre disa herë nga sulmet me raketa dhe dronë.
Sipas burimeve të cituara nga Financial Times, aktiviteti në portin Jebel Ali, më i madhi në rajon, ra me 90 deri në 95 për qind pasi Irani mbylli përkohësisht ngushticën në përgjigje të sulmeve amerikano-izraelite.
“Kemi plane konkrete për diversifikim që të përballojmë këtë situatë”, deklaroi një zyrtar i lartë i DP World për gazetën londineze.
Ai theksoi se projekti në bregdetin lindor ka karakter mbrojtës.
“Po shohim seriozisht mundësitë në bregdetin lindor. Është një masë mbrojtëse në rast se situata përkeqësohet”, tha ai.
Megjithatë, kompania thekson se porti Jebel Ali do të mbetet qendra kryesore logjistike e Emirateve.
“Jebel Ali do të vazhdojë të jetë Jebel Ali. Ai nuk do të zvogëlohet kurrë”, tha një tjetër drejtues i kompanisë.
Sipas raportimit, investimi fillestar do të arrijë në qindra miliona dollarë, ndërsa porti i ri mund të përfundojë brenda 18 muajve, nëse projekti merr miratimin përfundimtar.
