Loading ...
Ekonomia kineze po merr një shtysë të fortë nga rritja e eksporteve, ndërsa kërkesa globale për teknologji dhe inteligjencë artificiale vazhdon të rritet. Sipas të dhënave të publikuara të martën nga autoritetet doganore, eksportet e Kinës u rritën me 27% në qershor krahasuar me të njëjtin muaj të vitit të kaluar, duke regjistruar rritjen më të lartë në katër muajt e fundit.
Rezultati tejkaloi pritshmëritë e analistëve dhe u mbështet kryesisht nga eksporti i gjysmëpërçuesve (çipave), ndërsa gara globale për zhvillimin e inteligjencës artificiale ka nxitur investime të mëdha në sektorin e teknologjisë.
Edhe importet shënuan një rritje të fortë prej 36% në baza vjetore, niveli më i lartë në pesë vitet e fundit. Megjithatë, importet e naftës së papërpunuar ranë ndjeshëm. Të dhënat zyrtare tregojnë se Kina importoi 41.3% më pak naftë bruto në qershor krahasuar me një vit më parë, pasi rafineritë ulën aktivitetin dhe përdorën rezervat ekzistuese në vend të blerjeve të reja.
Rritja e eksporteve, së bashku me përmirësimin e vetë-mjaftueshmërisë energjetike, ka ndihmuar ekonominë kineze të zbusë pasojat e konfliktit në Lindjen e Mesme, veçanërisht luftës në Iran, e cila ka ndikuar në prodhimin e naftës dhe ka shkaktuar ndërprerje të furnizimeve për tregjet ndërkombëtare.
Ndërkohë, çmimi i naftës Brent, standardi global i referencës, u rrit me 1.4% të martën, duke arritur në 84.49 dollarë për fuçi, niveli më i lartë i një muaji. Kjo vjen vetëm një ditë pasi Brent regjistroi rritjen më të madhe ditore në gjashtë vitet e fundit, si pasojë e shqetësimeve për furnizimin me naftë në tregjet globale.
