Loading ...
Një central bërthamor në Francën jugperëndimore është ndalur përkohësisht për shkak të temperaturave të larta të shkaktuara nga vala e të nxehtit, njoftuan autoritetet e centralit.
Centrali bërthamor “Golfech Nuclear Power Plant”, i cili përdor ujërat e lumit Garonne për ftohjen e reaktorëve, ndaloi një nga dy reaktorët e tij dje në mbrëmje, pasi temperatura e ujit pritej të arrinte 28 gradë Celsius.
Sipas rregulloreve mjedisore franceze, temperatura e lumit nuk duhet të kalojë këtë kufi pas shkarkimeve të centralit, për të mbrojtur florën dhe faunën ujore.
Reaktori tjetër i centralit ndodhet tashmë jashtë funksionit për mirëmbajtje që prej muajit maj, duke bërë që i gjithë centrali të mbetet përkohësisht i ndalur.
Operatori energjetik EDF ka paralajmëruar gjithashtu se temperaturat e larta mund të ndikojnë edhe në prodhimin e centraleve të tjera bërthamore, përfshirë atë të “Bugey Nuclear Power Plant”.
