Loading ...
Shtetet e Bashkuara të Amerikës janë të hapura për të diskutuar stacionimin e përhershëm të trupave amerikane në Poloni, ka deklaruar ministri polak i Mbrojtjes, Władysław Kosiniak-Kamysz.
Duke folur pas bisedimeve me Sekretarin e Mbrojtjes të SHBA-së, Pete Hegseth, në margjinat e takimit të ministrave të Mbrojtjes të NATO-s në Bruksel, Kosiniak-Kamysz tha se Uashingtoni i është përgjigjur zyrtarisht ofertës së fundit të Polonisë për të pritur një bazë të përhershme ushtarake amerikane.
Sipas tij, në një letër të dërguar nga Pentagoni, Departamenti amerikan i Mbrojtjes e cilëson Poloninë si një “aleat model”, për shkak të rritjes së shpenzimeve të saj për mbrojtje dhe kontributit në sigurinë e NATO-s.
“Strategjia Kombëtare e Mbrojtjes e SHBA-së thotë qartë se Departamenti i Mbrojtjes do t’i japë përparësi angazhimit me aleatë model si Polonia, të cilët po bëjnë pjesën e tyre në mbrojtjen aleate”, tha ministri polak.
Ai shtoi se SHBA është shprehur e hapur ndaj propozimit të Varshavës për stacionimin e përhershëm të forcave amerikane në territorin polak, por theksoi se çdo vendim përfundimtar do të varet nga detajet e marrëveshjes mes palëve.
