Loading ...
Një ngjarje e rrezikshme si në filma aksion është zhvilluar në orët e para të mëngjesit në Lushnjë, duke përfunduar tragjikisht për protagonistin, një 43-vjeçar nga Karbunara e Vogël.
Ernis Xhumari është përplasur, sipas policisë, me bordurat anësore në rrethrrotullimin pranë vendit të quajtur “Fabrika e Plasmasit”, me makinën tip Benz, duke përfunduar i vdekur në vend. Makina e tij po lëvizte me shpejtësi të lartë pasi shoferi po i ikte patrullës së policisë. Kjo e fundit u njoftua nga salla operative për një shtetas që bënte manovra me makinë përpara komisariatit e më pas kishte zbritur nga makina duke thirrur me zë të lartë.
Por, pasi ka parë patrullën e policisë, 43-vjeçari ka marrë makinën për t’u larguar me shpejtësi në dalje të Lushnjës. I ndjekur nga makina me efektivët e patrullës së policisë, 43-vjeçari dyshohet se ka rritur shpejtësinë e mjetit në maksimum, duke humbur kontrollin pas afërsisht 6 km, në vendin e quajtur Rrethrrotullimi i “Plasmasit”.
Pasi është përplasur me barrierat anësore të rrugës, makina ka përfunduar e përmbysur mbi “ishullin” e rrethrrotullimit, duke lënë të vdekur drejtuesin.
Burime nga Komisariati i Lushnjës shpjeguan se ngjarja mund të ketë zanafillën një muaj më parë, kur viktima u arrestua për drejtim mjeti në gjendje të dehur. Në shenjë pakënaqësie ndaj arrestimit (gjykata e la të lirë më pas), 43-vjeçari dyshohet të ketë shkuar pranë komisariatit sot në agim, për të shprehur ankesën e tij.
Pas manovrave të rrezikshme në rrugë, veprimet e viktimës, të referuara nga policia në komunikatën zyrtare, mund të ishin të rrezikshme për qytetarë të tjerë, por në atë orar lëvizjet në rrugë ishin të pakta./abcnews.al
